Work 1 · Passage 34
Plato
Greek
λέγω γὰρ ὅνπερ νυνδὴ ἔλεγον, τὸν μεγάλα δυνάμενον πλεονεκτεῖν· τοῦτον οὖν σκόπει, εἴπερ βούλει κρίνειν ὅσῳ μᾶλλον συμφέρει ἰδίᾳ αὑτῷ ἄδικον εἶναι ἢ τὸ δίκαιον. πάντων δὲ ῥᾷστα μαθήσῃ, ἐὰν ἐπὶ τὴν τελεωτάτην ἀδικίαν ἔλθῃς, ἣ τὸν μὲν ἀδικήσαντα εὐδαιμονέστατον ποιεῖ, τοὺς δὲ ἀδικηθέντας καὶ ἀδικῆσαι οὐκ ἂν ἐθέλοντας ἀθλιωτάτους. ἔστιν δὲ τοῦτο τυραννίς, ἣ οὐ κατὰ σμικρὸν τἀλλότρια καὶ λάθρᾳ καὶ βίᾳ ἀφαιρεῖται, καὶ ἱερὰ καὶ ὅσια καὶ ἴδια καὶ δημόσια, ἀλλὰ συλλήβδην· ὧν ἐφʼ ἑκάστῳ μέρει ὅταν τις ἀδικήσας μὴ λάθῃ, ζημιοῦταί τε καὶ ὀνείδη ἔχει τὰ μέγιστα—καὶ γὰρ ἱερόσυλοι καὶ ἀνδραποδισταὶ καὶ τοιχωρύχοι καὶ ἀποστερηταὶ καὶ κλέπται οἱ κατὰ μέρη ἀδικοῦντες τῶν τοιούτων κακουργημάτων καλοῦνται—ἐπειδὰν δέ τις πρὸς τοῖς τῶν πολιτῶν χρήμασιν καὶ αὐτοὺς ἀνδραποδισάμενος δουλώσηται, ἀντὶ τούτων τῶν αἰσχρῶν ὀνομάτων εὐδαίμονες καὶ μακάριοι κέκληνται, οὐ μόνον ὑπὸ τῶν πολιτῶν ἀλλὰ καὶ ὑπὸ τῶν ἄλλων ὅσοι ἂν πύθωνται αὐτὸν τὴν ὅλην ἀδικίαν ἠδικηκότα· οὐ γὰρ τὸ ποιεῖν τὰ ἄδικα ἀλλὰ τὸ πάσχειν φοβούμενοι ὀνειδίζουσιν οἱ ὀνειδίζοντες τὴν ἀδικίαν. οὕτως, ὦ Σώκρατες, καὶ ἰσχυρότερον καὶ ἐλευθεριώτερον καὶ δεσποτικώτερον ἀδικία δικαιοσύνης ἐστὶν ἱκανῶς γιγνομένη, καὶ ὅπερ ἐξ ἀρχῆς ἔλεγον, τὸ μὲν τοῦ κρείττονος συμφέρον τὸ δίκαιον τυγχάνει ὄν, τὸ δʼ ἄδικον ἑαυτῷ λυσιτελοῦν τε καὶ συμφέρον. ταῦτα εἰπὼν ὁ Θρασύμαχος ἐν νῷ εἶχεν ἀπιέναι, ὥσπερ βαλανεὺς ἡμῶν καταντλήσας κατὰ τῶν ὤτων ἁθρόον καὶ πολὺν τὸν λόγον· οὐ μὴν εἴασάν γε αὐτὸν οἱ παρόντες, ἀλλʼ ἠνάγκασαν ὑπομεῖναί τε καὶ παρασχεῖν τῶν εἰρημένων λόγον. καὶ δὴ ἔγωγε καὶ αὐτὸς πάνυ ἐδεόμην τε καὶ εἶπον
Transliteration
legō gar honper nyndē elegon, ton megala dynamenon pleonektein touton oun skopei, eiper boulei krinein hosō mallon sympherei idia hautō adikon einai ē to dikaion. pantōn de rhasta mathēsē, ean epi tēn teleōtatēn adikian elthēs, hē ton men adikēsanta eudaimonestaton poiei, tous de adikēthentas kai adikēsai ouk an ethelontas athliōtatous. estin de touto tyrannis, hē ou kata smikron tallotria kai lathra kai bia aphaireitai, kai hiera kai hosia kai idia kai dēmosia, alla syllēbdēn hōn ephʼ hekastō merei hotan tis adikēsas mē lathē, zēmioutai te kai oneidē echei ta megista—kai gar hierosyloi kai andrapodistai kai toichōrychoi kai aposterētai kai kleptai hoi kata merē adikountes tōn toioutōn kakourgēmatōn kalountai—epeidan de tis pros tois tōn politōn chrēmasin kai autous andrapodisamenos doulōsētai, anti toutōn tōn aischrōn onomatōn eudaimones kai makarioi keklēntai, ou monon hypo tōn politōn alla kai hypo tōn allōn hosoi an pythōntai auton tēn holēn adikian ēdikēkota ou gar to poiein ta adika alla to paschein phoboumenoi oneidizousin hoi oneidizontes tēn adikian. houtōs, ō Sōkrates, kai ischyroteron kai eleutheriōteron kai despotikōteron adikia dikaiosynēs estin hikanōs gignomenē, kai hoper ex archēs elegon, to men tou kreittonos sympheron to dikaion tynchanei on, to dʼ adikon heautō lysiteloun te kai sympheron. tauta eipōn ho THrasymachos en nō eichen apienai, hōsper balaneus hēmōn katantlēsas kata tōn ōtōn hathroon kai polyn ton logon ou mēn eiasan ge auton hoi parontes, allʼ ēnankasan hypomeinai te kai paraschein tōn eirēmenōn logon. kai dē egōge kai autos pany edeomēn te kai eipon
Translation coming soon for this language.
Source edition (provenance)
perseus:tlg0059.tlg030.perseus-grc2; plato:rep; section 344 part 1; transliteration: greek-transliteration (build)