Languages

Work 2 · Passage 35

Work 2 · Passage 35

Plato

Greek

ὁ δὲ τό τε πρόσωπον μετέστρεφε, καὶ συνέλκων πανταχόθεν τὸ δέρμα ἐπὶ τὴν γαστέρα νῦν καλουμένην, ὥσπερ τὰ σύσπαστα βαλλάντια, ἓν στόμα ποιῶν ἀπέδει κατὰ μέσην τὴν γαστέρα, ὃ δὴ τὸν ὀμφαλὸν καλοῦσι. καὶ τὰς μὲν ἄλλας ῥυτίδας τὰς πολλὰς ἐξελέαινε καὶ τὰ στήθη διήρθρου, ἔχων τι τοιοῦτον ὄργανον οἷον οἱ σκυτοτόμοι περὶ τὸν καλάποδα λεαίνοντες τὰς τῶν σκυτῶν ῥυτίδας· ὀλίγας δὲ κατέλιπε, τὰς περὶ αὐτὴν τὴν γαστέρα καὶ τὸν ὀμφαλόν, μνημεῖον εἶναι τοῦ παλαιοῦ πάθους. ἐπειδὴ οὖν ἡ φύσις δίχα ἐτμήθη, ποθοῦν ἕκαστον τὸ ἥμισυ τὸ αὑτοῦ συνῄει, καὶ περιβάλλοντες τὰς χεῖρας καὶ συμπλεκόμενοι ἀλλήλοις, ἐπιθυμοῦντες συμφῦναι, ἀπέθνῃσκον ὑπὸ λιμοῦ καὶ τῆς ἄλλης ἀργίας διὰ τὸ μηδὲν ἐθέλειν χωρὶς ἀλλήλων ποιεῖν. καὶ ὁπότε τι ἀποθάνοι τῶν ἡμίσεων, τὸ δὲ λειφθείη, τὸ λειφθὲν ἄλλο ἐζήτει καὶ συνεπλέκετο, εἴτε γυναικὸς τῆς ὅλης ἐντύχοι ἡμίσει—ὃ δὴ νῦν γυναῖκα καλοῦμεν—εἴτε ἀνδρός· καὶ οὕτως ἀπώλλυντο. ἐλεήσας δὲ ὁ Ζεὺς ἄλλην μηχανὴν πορίζεται, καὶ μετατίθησιν αὐτῶν τὰ αἰδοῖα εἰς τὸ πρόσθεν—τέως γὰρ καὶ ταῦτα ἐκτὸς εἶχον, καὶ ἐγέννων καὶ ἔτικτον οὐκ εἰς ἀλλήλους ἀλλʼ εἰς γῆν, ὥσπερ οἱ τέττιγες—μετέθηκέ τε οὖν οὕτω αὐτῶν εἰς τὸ πρόσθεν καὶ διὰ τούτων τὴν γένεσιν ἐν ἀλλήλοις ἐποίησεν, διὰ τοῦ ἄρρενος ἐν τῷ θήλει, τῶνδε ἕνεκα, ἵνα ἐν τῇ συμπλοκῇ ἅμα μὲν εἰ ἀνὴρ γυναικὶ ἐντύχοι, γεννῷεν καὶ γίγνοιτο τὸ γένος, ἅμα δʼ εἰ καὶ ἄρρην ἄρρενι, πλησμονὴ γοῦν γίγνοιτο τῆς συνουσίας καὶ διαπαύοιντο καὶ ἐπὶ τὰ ἔργα τρέποιντο καὶ τοῦ ἄλλου βίου ἐπιμελοῖντο. ἔστι δὴ οὖν ἐκ τόσου ὁ ἔρως ἔμφυτος ἀλλήλων τοῖς ἀνθρώποις καὶ τῆς ἀρχαίας φύσεως συναγωγεὺς καὶ ἐπιχειρῶν ποιῆσαι ἓν ἐκ δυοῖν καὶ ἰάσασθαι τὴν φύσιν τὴν ἀνθρωπίνην. ἕκαστος οὖν ἡμῶν ἐστιν ἀνθρώπου σύμβολον, ἅτε τετμημένος ὥσπερ αἱ ψῆτται, ἐξ ἑνὸς δύο

Transliteration

ho de to te prosōpon metestrephe, kai synelkōn pantachothen to derma epi tēn gastera nyn kaloumenēn, hōsper ta syspasta ballantia, hen stoma poiōn apedei kata mesēn tēn gastera, ho dē ton omphalon kalousi. kai tas men allas rhytidas tas pollas exeleaine kai ta stēthē diērthrou, echōn ti toiouton organon hoion hoi skytotomoi peri ton kalapoda leainontes tas tōn skytōn rhytidas oligas de katelipe, tas peri autēn tēn gastera kai ton omphalon, mnēmeion einai tou palaiou pathous. epeidē oun hē physis dicha etmēthē, pothoun hekaston to hēmisy to hautou synēei, kai periballontes tas cheiras kai symplekomenoi allēlois, epithymountes symphynai, apethnēskon hypo limou kai tēs allēs argias dia to mēden ethelein chōris allēlōn poiein. kai hopote ti apothanoi tōn hēmiseōn, to de leiphtheiē, to leiphthen allo ezētei kai synepleketo, eite gynaikos tēs holēs entychoi hēmisei—o dē nyn gynaika kaloumen—eite andros kai houtōs apōllynto. eleēsas de ho Zeus allēn mēchanēn porizetai, kai metatithēsin autōn ta aidoia eis to prosthen—teōs gar kai tauta ektos eichon, kai egennōn kai etikton ouk eis allēlous allʼ eis gēn, hōsper hoi tettiges—metethēke te oun houtō autōn eis to prosthen kai dia toutōn tēn genesin en allēlois epoiēsen, dia tou arrhenos en tō thēlei, tōnde heneka, hina en tē symplokē hama men ei anēr gynaiki entychoi, gennōen kai gignoito to genos, hama dʼ ei kai arrhēn arrheni, plēsmonē goun gignoito tēs synousias kai diapauointo kai epi ta erga trepointo kai tou allou biou epimelointo. esti dē oun ek tosou ho erōs emphytos allēlōn tois anthrōpois kai tēs archaias physeōs synagōgeus kai epicheirōn poiēsai hen ek dyoin kai iasasthai tēn physin tēn anthrōpinēn. hekastos oun hēmōn estin anthrōpou symbolon, hate tetmēmenos hōsper hai psēttai, ex henos dyo

Translation coming soon for this language.

Source edition (provenance)

perseus:tlg0059.tlg011.perseus-grc2; plato:symposium; section 191 part 1; transliteration: greek-transliteration (build)

Share X Facebook