Languages

Work 2 · Passage 74

Work 2 · Passage 74

Plato

Greek

ἆρʼ οἴει, ἔφη, φαῦλον βίον γίγνεσθαι ἐκεῖσε βλέποντος ἀνθρώπου καὶ ἐκεῖνο ᾧ δεῖ θεωμένου καὶ συνόντος αὐτῷ; ἢ οὐκ ἐνθυμῇ, ἔφη, ὅτι ἐνταῦθα αὐτῷ μοναχοῦ γενήσεται, ὁρῶντι ᾧ ὁρατὸν τὸ καλόν, τίκτειν οὐκ εἴδωλα ἀρετῆς, ἅτε οὐκ εἰδώλου ἐφαπτομένῳ, ἀλλὰ ἀληθῆ, ἅτε τοῦ ἀληθοῦς ἐφαπτομένῳ· τεκόντι δὲ ἀρετὴν ἀληθῆ καὶ θρεψαμένῳ ὑπάρχει θεοφιλεῖ γενέσθαι, καὶ εἴπέρ τῳ ἄλλῳ ἀνθρώπων ἀθανάτῳ καὶ ἐκείνῳ; ταῦτα δή, ὦ Φαῖδρέ τε καὶ οἱ ἄλλοι, ἔφη μὲν Διοτίμα, πέπεισμαι δʼ ἐγώ· πεπεισμένος δὲ πειρῶμαι καὶ τοὺς ἄλλους πείθειν ὅτι τούτου τοῦ κτήματος τῇ ἀνθρωπείᾳ φύσει συνεργὸν ἀμείνω Ἔρωτος οὐκ ἄν τις ῥᾳδίως λάβοι. διὸ δὴ ἔγωγέ φημι χρῆναι πάντα ἄνδρα τὸν ἔρωτα τιμᾶν, καὶ αὐτὸς τιμῶ τὰ ἐρωτικὰ καὶ διαφερόντως ἀσκῶ, καὶ τοῖς ἄλλοις παρακελεύομαι, καὶ νῦν τε καὶ ἀεὶ ἐγκωμιάζω τὴν δύναμιν καὶ ἀνδρείαν τοῦ Ἔρωτος καθʼ ὅσον οἷός τʼ εἰμί. τοῦτον οὖν τὸν λόγον, ὦ Φαῖδρε, εἰ μὲν βούλει, ὡς ἐγκώμιον εἰς ἔρωτα νόμισον εἰρῆσθαι, εἰ δέ, ὅτι καὶ ὅπῃ χαίρεις ὀνομάζων, τοῦτο ὀνόμαζε. εἰπόντος δὲ ταῦτα τοῦ Σωκράτους τοὺς μὲν ἐπαινεῖν, τὸν δὲ Ἀριστοφάνη λέγειν τι ἐπιχειρεῖν, ὅτι ἐμνήσθη αὐτοῦ λέγων ὁ Σωκράτης περὶ τοῦ λόγου· καὶ ἐξαίφνης τὴν αὔλειον θύραν κρουομένην πολὺν ψόφον παρασχεῖν ὡς κωμαστῶν, καὶ αὐλητρίδος φωνὴν ἀκούειν. τὸν οὖν Ἀγάθωνα, παῖδες, φάναι, οὐ σκέψεσθε; καὶ ἐὰν μέν τις τῶν ἐπιτηδείων ᾖ, καλεῖτε· εἰ δὲ μή, λέγετε ὅτι οὐ πίνομεν ἀλλʼ ἀναπαυόμεθα ἤδη. καὶ οὐ πολὺ ὕστερον Ἀλκιβιάδου τὴν φωνὴν ἀκούειν ἐν τῇ αὐλῇ σφόδρα μεθύοντος καὶ μέγα βοῶντος, ἐρωτῶντος ὅπου Ἀγάθων καὶ κελεύοντος ἄγειν παρʼ Ἀγάθωνα. ἄγειν οὖν αὐτὸν παρὰ σφᾶς τήν τε αὐλητρίδα ὑπολαβοῦσαν καὶ ἄλλους τινὰς τῶν ἀκολούθων, καὶ ἐπιστῆναι ἐπὶ τὰς θύρας ἐστεφανωμένον αὐτὸν κιττοῦ τέ τινι στεφάνῳ δασεῖ καὶ ἴων, καὶ ταινίας ἔχοντα ἐπὶ τῆς κεφαλῆς πάνυ πολλάς, καὶ εἰπεῖν· ἄνδρες, χαίρετε

Transliteration

arʼ oiei, ephē, phaulon bion gignesthai ekeise blepontos anthrōpou kai ekeino hō dei theōmenou kai synontos autō; ē ouk enthymē, ephē, hoti entautha autō monachou genēsetai, horōnti hō horaton to kalon, tiktein ouk eidōla aretēs, hate ouk eidōlou ephaptomenō, alla alēthē, hate tou alēthous ephaptomenō tekonti de aretēn alēthē kai threpsamenō hyparchei theophilei genesthai, kai eiper tō allō anthrōpōn athanatō kai ekeinō; tauta dē, ō PHaidre te kai hoi alloi, ephē men Diotima, pepeismai dʼ egō pepeismenos de peirōmai kai tous allous peithein hoti toutoy tou ktēmatos tē anthrōpeia physei synergon ameinō Erōtos ouk an tis rhadiōs laboi. dio dē egōge phēmi chrēnai panta andra ton erōta timan, kai autos timō ta erōtika kai diapherontōs askō, kai tois allois parakeleuomai, kai nyn te kai aei enkōmiazō tēn dynamin kai andreian tou Erōtos kathʼ hoson hoios tʼ eimi. touton oun ton logon, ō PHaidre, ei men boulei, hōs enkōmion eis erōta nomison eirēsthai, ei de, hoti kai hopē chaireis onomazōn, touto onomaze. eipontos de tauta tou Sōkratous tous men epainein, ton de Aristophanē legein ti epicheirein, hoti emnēsthē autou legōn ho Sōkratēs peri tou logou kai exaiphnēs tēn auleion thyran krouomenēn polyn psophon paraschein hōs kōmastōn, kai aulētridos phōnēn akouein. ton oun Agathōna, paides, phanai, ou skepsesthe; kai ean men tis tōn epitēdeiōn ē, kaleite ei de mē, legete hoti ou pinomen allʼ anapauometha ēdē. kai ou poly hysteron Alkibiadou tēn phōnēn akouein en tē aulē sphodra methyontos kai mega boōntos, erōtōntos hopou Agathōn kai keleuontos agein parʼ Agathōna. agein oun auton para sphas tēn te aulētrida hypolabousan kai allous tinas tōn akolouthōn, kai epistēnai epi tas thyras estephanōmenon auton kittou te tini stephanō dasei kai iōn, kai tainias echonta epi tēs kephalēs pany pollas, kai eipein andres, chairete

Translation coming soon for this language.

Source edition (provenance)

perseus:tlg0059.tlg011.perseus-grc2; plato:symposium; section 212 part 1; transliteration: greek-transliteration (build)

Share X Facebook