Work 2 · Passage 88
Plato
Greek
· δικασταὶ γάρ ἐστε τῆς Σωκράτους ὑπερηφανίας—εὖ γὰρ ἴστε μὰ θεούς, μὰ θεάς, οὐδὲν περιττότερον καταδεδαρθηκὼς ἀνέστην μετὰ Σωκράτους, ἢ εἰ μετὰ πατρὸς καθηῦδον ἢ ἀδελφοῦ πρεσβυτέρου. τὸ δὴ μετὰ τοῦτο τίνα οἴεσθέ με διάνοιαν ἔχειν, ἡγούμενον μὲν ἠτιμάσθαι, ἀγάμενον δὲ τὴν τούτου φύσιν τε καὶ σωφροσύνην καὶ ἀνδρείαν, ἐντετυχηκότα ἀνθρώπῳ τοιούτῳ οἵῳ ἐγὼ οὐκ ἂν ᾤμην ποτʼ ἐντυχεῖν εἰς φρόνησιν καὶ εἰς καρτερίαν; ὥστε οὔθʼ ὅπως οὖν ὀργιζοίμην εἶχον καὶ ἀποστερηθείην τῆς τούτου συνουσίας, οὔτε ὅπῃ προσαγαγοίμην αὐτὸν ηὐπόρουν. εὖ γὰρ ᾔδη ὅτι χρήμασί γε πολὺ μᾶλλον ἄτρωτος ἦν πανταχῇ ἢ σιδήρῳ ὁ Αἴας, ᾧ τε ᾤμην αὐτὸν μόνῳ ἁλώσεσθαι, διεπεφεύγει με. ἠπόρουν δή, καταδεδουλωμένος τε ὑπὸ τοῦ ἀνθρώπου ὡς οὐδεὶς ὑπʼ οὐδενὸς ἄλλου περιῇα. ταῦτά τε γάρ μοι ἅπαντα προυγεγόνει, καὶ μετὰ ταῦτα στρατεία ἡμῖν εἰς Ποτείδαιαν ἐγένετο κοινὴ καὶ συνεσιτοῦμεν ἐκεῖ.
Transliteration
dikastai gar este tēs Sōkratous hyperēphanias—eu gar iste ma theous, ma theas, ouden perittoteron katadedarthēkōs anestēn meta Sōkratous, ē ei meta patros kathēudon ē adelphou presbyterou. to dē meta touto tina oiesthe me dianoian echein, hēgoumenon men ētimasthai, agamenon de tēn toutoy physin te kai sōphrosynēn kai andreian, entetychēkota anthrōpō toioutō hoiō egō ouk an ōmēn potʼ entychein eis phronēsin kai eis karterian; hōste outhʼ hopōs oun orgizoimēn eichon kai aposterētheiēn tēs toutoy synousias, oute hopē prosagagoimēn auton ēuporoun. eu gar ēdē hoti chrēmasi ge poly mallon atrōtos ēn pantachē ē sidērō ho Aias, hō te ōmēn auton monō halōsesthai, diepepheugei me. ēporoun dē, katadedoulōmenos te hypo tou anthrōpou hōs oudeis hypʼ oudenos allou periēa. tauta te gar moi hapanta prougegonei, kai meta tauta strateia hēmin eis Poteidaian egeneto koinē kai synesitoumen ekei.
Translation coming soon for this language.
Source edition (provenance)
perseus:tlg0059.tlg011.perseus-grc2; plato:symposium; section 219 part 2; transliteration: greek-transliteration (build)