Work 1 · Passage 18
Aristotle
Greek
πότερον οὖν οὐδʼ ἄλλον οὐδένα ἀνθρώπων εὐδαιμονιστέον ἕως ἂν ζῇ, κατὰ Σόλωνα δὲ χρεὼν τέλος ὁρᾶν; εἰ δὲ δὴ καὶ θετέον οὕτως, ἆρά γε καὶ ἔστιν εὐδαίμων τότε ἐπειδὰν ἀποθάνῃ; ἢ τοῦτό γε παντελῶς ἄτοπον, ἄλλως τε καὶ τοῖς λέγουσιν ἡμῖν ἐνέργειάν τινα τὴν εὐδαιμονίαν; εἰ δὲ μὴ λέγομεν τὸν τεθνεῶτα εὐδαίμονα, μηδὲ Σόλων τοῦτο βούλεται, ἀλλʼ ὅτι τηνικαῦτα ἄν τις ἀσφαλῶς μακαρίσειεν ἄνθρωπον ὡς ἐκτὸς ἤδη τῶν κακῶν ὄντα καὶ τῶν δυστυχημάτων, ἔχει μὲν καὶ τοῦτʼ ἀμφισβήτησίν τινα· δοκεῖ γὰρ εἶναί τι τῷ τεθνεῶτι καὶ κακὸν καὶ ἀγαθόν, εἴπερ καὶ τῷ ζῶντι μὴ αἰσθανομένῳ δέ, οἷον τιμαὶ καὶ ἀτιμίαι καὶ τέκνων καὶ ὅλως ἀπογόνων εὐπραξίαι τε καὶ δυστυχίαι. ἀπορίαν δὲ καὶ ταῦτα παρέχει· τῷ γὰρ μακαρίως βεβιωκότι μέχρι γήρως καὶ τελευτήσαντι κατὰ λόγον ἐνδέχεται πολλὰς μεταβολὰς συμβαίνειν περὶ τοὺς ἐκγόνους, καὶ τοὺς μὲν αὐτῶν ἀγαθοὺς εἶναι καὶ τυχεῖν βίου τοῦ κατʼ ἀξίαν, τοὺς δʼ ἐξ ἐναντίας· δῆλον δʼ ὅτι καὶ τοῖς ἀποστήμασι πρὸς τοὺς γονεῖς παντοδαπῶς ἔχειν αὐτοὺς ἐνδέχεται. ἄτοπον δὴ γίνοιτʼ ἄν, εἰ συμμεταβάλλοι καὶ ὁ τεθνεὼς καὶ γίνοιτο ὁτὲ μὲν εὐδαίμων πάλιν δʼ ἄθλιος· ἄτοπον δὲ καὶ τὸ μηδὲν μηδʼ ἐπί τινα χρόνον συνικνεῖσθαι τὰ τῶν ἐκγόνων τοῖς γονεῦσιν. ἀλλʼ ἐπανιτέον ἐπὶ τὸ πρότερον ἀπορηθέν
Transliteration
poteron oun oudʼ allon oudena anthropon eudaimonisteon heos an ze, kata Solona de chreon telos horan; ei de de kai theteon houtos, ara ge kai estin eudaimon tote epeidan apothane; e touto ge pantelos atopon, allos te kai tois legousin hemin energeian tina ten eudaimonian; ei de me legomen ton tethneota eudaimona, mede Solon touto bouletai, allʼ hoti tenikauta an tis asphalos makariseien anthropon hos ektos ede ton kakon onta kai ton dystychematon, echei men kai toutʼ amphisbetesin tina dokei gar einai ti to tethneoti kai kakon kai agathon, eiper kai to zonti me aisthanomeno de, hoion timai kai atimiai kai teknon kai holos apogonon eupraxiai te kai dystychiai. aporian de kai tauta parechei to gar makarios bebiokoti mechri geros kai teleutesanti kata logon endechetai pollas metabolas symbainein peri tous ekgonous, kai tous men auton agathous einai kai tychein biou tou katʼ axian, tous dʼ ex enantias delon dʼ hoti kai tois apostemasi pros tous goneis pantodapos echein autous endechetai. atopon de ginoitʼ an, ei symmetaballoi kai ho tethneos kai ginoito hote men eudaimon palin dʼ athlios atopon de kai to meden medʼ epi tina chronon synikneisthai ta ton ekgonon tois goneusin. allʼ epaniteon epi to proteron aporethen
Translation coming soon for this language.
Source edition (provenance)
perseus:tlg0086.tlg010.perseus-grc2; aristotle:ne; book 1 section 10 part 1; bekker 1100b; transliteration: greek-transliteration (build)