Languages

Work 2 · Passage 19

Work 2 · Passage 19

Plato

Greek

οὗτοι γάρ εἰσιν οἱ καὶ τὸ ὄνειδος πεποιηκότες, ὥστε τινὰς τολμᾶν λέγειν ὡς αἰσχρὸν χαρίζεσθαι ἐρασταῖς· λέγουσι δὲ εἰς τούτους ἀποβλέποντες, ὁρῶντες αὐτῶν τὴν ἀκαιρίαν καὶ ἀδικίαν, ἐπεὶ οὐ δήπου κοσμίως γε καὶ νομίμως ὁτιοῦν πρᾶγμα πραττόμενον ψόγον ἂν δικαίως φέροι. καὶ δὴ καὶ ὁ περὶ τὸν ἔρωτα νόμος ἐν μὲν ταῖς ἄλλαις πόλεσι νοῆσαι ῥᾴδιος, ἁπλῶς γὰρ ὥρισται· ὁ δʼ ἐνθάδε καὶ ἐν Λακεδαίμονι ποικίλος. ἐν Ἤλιδι μὲν γὰρ καὶ ἐν Βοιωτοῖς, καὶ οὗ μὴ σοφοὶ λέγειν, ἁπλῶς νενομοθέτηται καλὸν τὸ χαρίζεσθαι ἐρασταῖς, καὶ οὐκ ἄν τις εἴποι οὔτε νέος οὔτε παλαιὸς ὡς αἰσχρόν, ἵνα οἶμαι μὴ πράγματʼ ἔχωσιν λόγῳ πειρώμενοι πείθειν τοὺς νέους, ἅτε ἀδύνατοι λέγειν· τῆς δὲ Ἰωνίας καὶ ἄλλοθι πολλαχοῦ αἰσχρὸν νενόμισται, ὅσοι ὑπὸ βαρβάροις οἰκοῦσιν. τοῖς γὰρ βαρβάροις διὰ τὰς τυραννίδας αἰσχρὸν τοῦτό γε καὶ ἥ γε φιλοσοφία καὶ ἡ φιλογυμναστία· οὐ γὰρ οἶμαι συμφέρει τοῖς ἄρχουσι φρονήματα μεγάλα ἐγγίγνεσθαι τῶν ἀρχομένων, οὐδὲ φιλίας ἰσχυρὰς καὶ κοινωνίας, ὃ δὴ μάλιστα φιλεῖ τά τε ἄλλα πάντα καὶ ὁ ἔρως ἐμποιεῖν. ἔργῳ δὲ τοῦτο ἔμαθον καὶ οἱ ἐνθάδε τύραννοι· ὁ γὰρ Ἀριστογείτονος ἔρως καὶ ἡ Ἁρμοδίου φιλία βέβαιος γενομένη κατέλυσεν αὐτῶν τὴν ἀρχήν. οὕτως οὗ μὲν αἰσχρὸν ἐτέθη χαρίζεσθαι ἐρασταῖς, κακίᾳ τῶν θεμένων κεῖται, τῶν μὲν ἀρχόντων πλεονεξίᾳ, τῶν δὲ ἀρχομένων ἀνανδρίᾳ· οὗ δὲ καλὸν ἁπλῶς ἐνομίσθη, διὰ τὴν τῶν θεμένων τῆς ψυχῆς ἀργίαν. ἐνθάδε δὲ πολὺ τούτων κάλλιον νενομοθέτηται, καὶ ὅπερ εἶπον, οὐ ῥᾴδιον κατανοῆσαι.

Transliteration

houtoi gar eisin hoi kai to oneidos pepoiēkotes, hōste tinas tolman legein hōs aischron charizesthai erastais legousi de eis toutoys apoblepontes, horōntes autōn tēn akairian kai adikian, epei ou dēpou kosmiōs ge kai nomimōs hotioun pragma prattomenon psogon an dikaiōs pheroi. kai dē kai ho peri ton erōta nomos en men tais allais polesi noēsai rhadios, haplōs gar hōristai ho dʼ enthade kai en Lakedaimoni poikilos. en Ēlidi men gar kai en Boiōtois, kai hou mē sophoi legein, haplōs nenomothetētai kalon to charizesthai erastais, kai ouk an tis eipoi oute neos oute palaios hōs aischron, hina oimai mē pragmatʼ echōsin logō peirōmenoi peithein tous neous, hate adynatoi legein tēs de Iōnias kai allothi pollachou aischron nenomistai, hosoi hypo barbarois oikousin. tois gar barbarois dia tas tyrannidas aischron touto ge kai hē ge philosophia kai hē philogymnastia ou gar oimai sympherei tois archousi phronēmata megala engignesthai tōn archomenōn, oude philias ischyras kai koinōnias, ho dē malista philei ta te alla panta kai ho erōs empoiein. ergō de touto emathon kai hoi enthade tyrannoi ho gar Aristogeitonos erōs kai hē hArmodiou philia bebaios genomenē katelysen autōn tēn archēn. houtōs hou men aischron etethē charizesthai erastais, kakia tōn themenōn keitai, tōn men archontōn pleonexia, tōn de archomenōn anandria hou de kalon haplōs enomisthē, dia tēn tōn themenōn tēs psychēs argian. enthade de poly toutōn kallion nenomothetētai, kai hoper eipon, ou rhadion katanoēsai.

Translation coming soon for this language.

Source edition (provenance)

perseus:tlg0059.tlg011.perseus-grc2; plato:symposium; section 182; transliteration: greek-transliteration (build)

Share X Facebook