Work 2 · Passage 68
Plato
Greek
πολὺ δὲ τούτων ἀτοπώτερον ἔτι, ὅτι καὶ αἱ ἐπιστῆμαι μὴ ὅτι αἱ μὲν γίγνονται, αἱ δὲ ἀπόλλυνται ἡμῖν, καὶ οὐδέποτε οἱ αὐτοί ἐσμεν οὐδὲ κατὰ τὰς ἐπιστήμας, ἀλλὰ καὶ μία ἑκάστη τῶν ἐπιστημῶν ταὐτὸν πάσχει. ὃ γὰρ καλεῖται μελετᾶν, ὡς ἐξιούσης ἐστὶ τῆς ἐπιστήμης· λήθη γὰρ ἐπιστήμης ἔξοδος, μελέτη δὲ πάλιν καινὴν ἐμποιοῦσα ἀντὶ τῆς ἀπιούσης μνήμην σῴζει τὴν ἐπιστήμην, ὥστε τὴν αὐτὴν δοκεῖν εἶναι. τούτῳ γὰρ τῷ τρόπῳ πᾶν τὸ θνητὸν σῴζεται, οὐ τῷ παντάπασιν τὸ αὐτὸ ἀεὶ εἶναι ὥσπερ τὸ θεῖον, ἀλλὰ τῷ τὸ ἀπιὸν καὶ παλαιούμενον ἕτερον νέον ἐγκαταλείπειν οἷον αὐτὸ ἦν. ταύτῃ τῇ μηχανῇ, ὦ Σώκρατες, ἔφη, θνητὸν ἀθανασίας μετέχει, καὶ σῶμα καὶ τἆλλα πάντα· ἀθάνατον δὲ ἄλλῃ. μὴ οὖν θαύμαζε εἰ τὸ αὑτοῦ ἀποβλάστημα φύσει πᾶν τιμᾷ· ἀθανασίας γὰρ χάριν παντὶ αὕτη ἡ σπουδὴ καὶ ὁ ἔρως ἕπεται. καὶ ἐγὼ ἀκούσας τὸν λόγον ἐθαύμασά τε καὶ εἶπον εἶεν, ἦν δʼ ἐγώ, ὦ σοφωτάτη Διοτίμα, ταῦτα ὡς ἀληθῶς οὕτως ἔχει; καὶ ἥ, ὥσπερ οἱ τέλεοι σοφισταί, εὖ ἴσθι, ἔφη, ὦ Σώκρατες· ἐπεί γε καὶ τῶν ἀνθρώπων εἰ ἐθέλεις εἰς τὴν φιλοτιμίαν βλέψαι, θαυμάζοις ἂν τῆς ἀλογίας περὶ ἃ ἐγὼ εἴρηκα εἰ μὴ ἐννοεῖς, ἐνθυμηθεὶς ὡς δεινῶς διάκεινται ἔρωτι τοῦ ὀνομαστοὶ γενέσθαι καὶ κλέος ἐς τὸν ἀεὶ χρόνον ἀθάνατον καταθέσθαι, καὶ ὑπὲρ τούτου κινδύνους τε κινδυνεύειν ἕτοιμοί εἰσι πάντας ἔτι μᾶλλον ἢ ὑπὲρ τῶν παίδων, καὶ χρήματα ἀναλίσκειν καὶ πόνους πονεῖν οὑστινασοῦν καὶ ὑπεραποθνῄσκειν. ἐπεὶ οἴει σύ, ἔφη, Ἄλκηστιν ὑπὲρ Ἀδμήτου ἀποθανεῖν ἄν, ἢ Ἀχιλλέα Πατρόκλῳ ἐπαποθανεῖν, ἢ προαποθανεῖν τὸν ὑμέτερον Κόδρον ὑπὲρ τῆς βασιλείας τῶν παίδων, μὴ οἰομένους ἀθάνατον μνήμην ἀρετῆς πέρι ἑαυτῶν ἔσεσθαι, ἣν νῦν ἡμεῖς ἔχομεν; πολλοῦ γε δεῖ, ἔφη, ἀλλʼ οἶμαι ὑπὲρ ἀρετῆς ἀθανάτου καὶ τοιαύτης δόξης εὐκλεοῦς πάντες πάντα ποιοῦσιν, ὅσῳ ἂν ἀμείνους ὦσι, τοσούτῳ μᾶλλον· τοῦ γὰρ ἀθανάτου ἐρῶσιν.
Transliteration
poly de toutōn atopōteron eti, hoti kai hai epistēmai mē hoti hai men gignontai, hai de apollyntai hēmin, kai oudepote hoi autoi esmen oude kata tas epistēmas, alla kai mia hekastē tōn epistēmōn tauton paschei. ho gar kaleitai meletan, hōs exiousēs esti tēs epistēmēs lēthē gar epistēmēs exodos, meletē de palin kainēn empoiousa anti tēs apiousēs mnēmēn sōzei tēn epistēmēn, hōste tēn autēn dokein einai. toutō gar tō tropō pan to thnēton sōzetai, ou tō pantapasin to auto aei einai hōsper to theion, alla tō to apion kai palaioumenon heteron neon enkataleipein hoion auto ēn. tautē tē mēchanē, ō Sōkrates, ephē, thnēton athanasias metechei, kai sōma kai talla panta athanaton de allē. mē oun thaumaze ei to hautou apoblastēma physei pan tima athanasias gar charin panti hautē hē spoudē kai ho erōs hepetai. kai egō akousas ton logon ethaumasa te kai eipon eien, ēn dʼ egō, ō sophōtatē Diotima, tauta hōs alēthōs houtōs echei; kai hē, hōsper hoi teleoi sophistai, eu isthi, ephē, ō Sōkrates epei ge kai tōn anthrōpōn ei etheleis eis tēn philotimian blepsai, thaumazois an tēs alogias peri ha egō eirēka ei mē ennoeis, enthymētheis hōs deinōs diakeintai erōti tou onomastoi genesthai kai kleos es ton aei chronon athanaton katathesthai, kai hyper toutoy kindynous te kindyneuein hetoimoi eisi pantas eti mallon ē hyper tōn paidōn, kai chrēmata analiskein kai ponous ponein houstinasoyn kai hyperapothnēskein. epei oiei sy, ephē, Alkēstin hyper Admētou apothanein an, ē Achillea Patroklō epapothanein, ē proapothanein ton hymeteron Kodron hyper tēs basileias tōn paidōn, mē oiomenous athanaton mnēmēn aretēs peri heautōn esesthai, hēn nyn hēmeis echomen; pollou ge dei, ephē, allʼ oimai hyper aretēs athanatou kai toiautēs doxēs eukleous pantes panta poiousin, hosō an ameinous ōsi, tosoutō mallon tou gar athanatou erōsin.
Translation coming soon for this language.
Source edition (provenance)
perseus:tlg0059.tlg011.perseus-grc2; plato:symposium; section 208; transliteration: greek-transliteration (build)