Work 2 · Passage 71
Plato
Greek
ταῦτα μὲν οὖν τὰ ἐρωτικὰ ἴσως, ὦ Σώκρατες, κἂν σὺ μυηθείης· τὰ δὲ τέλεα καὶ ἐποπτικά, ὧν ἕνεκα καὶ ταῦτα ἔστιν, ἐάν τις ὀρθῶς μετίῃ, οὐκ οἶδʼ εἰ οἷός τʼ ἂν εἴης. ἐρῶ μὲν οὖν, ἔφη, ἐγὼ καὶ προθυμίας οὐδὲν ἀπολείψω· πειρῶ δὲ ἕπεσθαι, ἂν οἷός τε ᾖς. δεῖ γάρ, ἔφη, τὸν ὀρθῶς ἰόντα ἐπὶ τοῦτο τὸ πρᾶγμα ἄρχεσθαι μὲν νέον ὄντα ἰέναι ἐπὶ τὰ καλὰ σώματα, καὶ πρῶτον μέν, ἐὰν ὀρθῶς ἡγῆται ὁ ἡγούμενος, ἑνὸς αὐτὸν σώματος ἐρᾶν καὶ ἐνταῦθα γεννᾶν λόγους καλούς, ἔπειτα δὲ αὐτὸν κατανοῆσαι ὅτι τὸ κάλλος τὸ ἐπὶ ὁτῳοῦν σώματι τῷ ἐπὶ ἑτέρῳ σώματι ἀδελφόν ἐστι, καὶ εἰ δεῖ διώκειν τὸ ἐπʼ εἴδει καλόν, πολλὴ ἄνοια μὴ οὐχ ἕν τε καὶ ταὐτὸν ἡγεῖσθαι τὸ ἐπὶ πᾶσιν τοῖς σώμασι κάλλος· τοῦτο δʼ ἐννοήσαντα καταστῆναι πάντων τῶν καλῶν σωμάτων ἐραστήν, ἑνὸς δὲ τὸ σφόδρα τοῦτο χαλάσαι καταφρονήσαντα καὶ σμικρὸν ἡγησάμενον· μετὰ δὲ ταῦτα τὸ ἐν ταῖς ψυχαῖς κάλλος τιμιώτερον ἡγήσασθαι τοῦ ἐν τῷ σώματι, ὥστε καὶ ἐὰν ἐπιεικὴς ὢν τὴν ψυχήν τις κἂν σμικρὸν ἄνθος ἔχῃ, ἐξαρκεῖν αὐτῷ καὶ ἐρᾶν καὶ κήδεσθαι καὶ τίκτειν λόγους τοιούτους καὶ ζητεῖν, οἵτινες ποιήσουσι βελτίους τοὺς νέους, ἵνα ἀναγκασθῇ αὖ θεάσασθαι τὸ ἐν τοῖς ἐπιτηδεύμασι καὶ τοῖς νόμοις καλὸν καὶ τοῦτʼ ἰδεῖν ὅτι πᾶν αὐτὸ αὑτῷ συγγενές ἐστιν, ἵνα τὸ περὶ τὸ σῶμα καλὸν σμικρόν τι ἡγήσηται εἶναι· μετὰ δὲ τὰ ἐπιτηδεύματα ἐπὶ τὰς ἐπιστήμας ἀγαγεῖν, ἵνα ἴδῃ αὖ ἐπιστημῶν κάλλος, καὶ βλέπων πρὸς πολὺ ἤδη τὸ καλὸν μηκέτι τὸ παρʼ ἑνί, ὥσπερ οἰκέτης, ἀγαπῶν παιδαρίου κάλλος ἢ ἀνθρώπου τινὸς ἢ ἐπιτηδεύματος ἑνός, δουλεύων φαῦλος ᾖ καὶ σμικρολόγος, ἀλλʼ ἐπὶ τὸ πολὺ πέλαγος τετραμμένος τοῦ καλοῦ καὶ θεωρῶν πολλοὺς καὶ καλοὺς λόγους καὶ μεγαλοπρεπεῖς τίκτῃ καὶ διανοήματα ἐν φιλοσοφίᾳ ἀφθόνῳ, ἕως ἂν ἐνταῦθα ῥωσθεὶς καὶ αὐξηθεὶς κατίδῃ τινὰ ἐπιστήμην μίαν τοιαύτην, ἥ ἐστι καλοῦ τοιοῦδε. πειρῶ δέ μοι, ἔφη, τὸν νοῦν προσέχειν ὡς οἷόν τε μάλιστα.
Transliteration
tauta men oun ta erōtika isōs, ō Sōkrates, kan sy myētheiēs ta de telea kai epoptika, hōn heneka kai tauta estin, ean tis orthōs metiē, ouk oidʼ ei hoios tʼ an eiēs. erō men oun, ephē, egō kai prothymias ouden apoleipsō peirō de hepesthai, an hoios te ēs. dei gar, ephē, ton orthōs ionta epi touto to pragma archesthai men neon onta ienai epi ta kala sōmata, kai prōton men, ean orthōs hēgētai ho hēgoumenos, henos auton sōmatos eran kai entautha gennan logous kalous, epeita de auton katanoēsai hoti to kallos to epi hotōoun sōmati tō epi heterō sōmati adelphon esti, kai ei dei diōkein to epʼ eidei kalon, pollē anoia mē ouch hen te kai tauton hēgeisthai to epi pasin tois sōmasi kallos touto dʼ ennoēsanta katastēnai pantōn tōn kalōn sōmatōn erastēn, henos de to sphodra touto chalasai kataphronēsanta kai smikron hēgēsamenon meta de tauta to en tais psychais kallos timiōteron hēgēsasthai tou en tō sōmati, hōste kai ean epieikēs ōn tēn psychēn tis kan smikron anthos echē, exarkein autō kai eran kai kēdesthai kai tiktein logous toioutoys kai zētein, hoitines poiēsousi beltious tous neous, hina anankasthē au theasasthai to en tois epitēdeumasi kai tois nomois kalon kai toutʼ idein hoti pan auto hautō syngenes estin, hina to peri to sōma kalon smikron ti hēgēsētai einai meta de ta epitēdeumata epi tas epistēmas agagein, hina idē au epistēmōn kallos, kai blepōn pros poly ēdē to kalon mēketi to parʼ heni, hōsper oiketēs, agapōn paidariou kallos ē anthrōpou tinos ē epitēdeumatos henos, douleuōn phaulos ē kai smikrologos, allʼ epi to poly pelagos tetrammenos tou kalou kai theōrōn pollous kai kalous logous kai megaloprepeis tiktē kai dianoēmata en philosophia aphthonō, heōs an entautha rhōstheis kai auxētheis katidē tina epistēmēn mian toiautēn, hē esti kalou toioude. peirō de moi, ephē, ton noun prosechein hōs hoion te malista.
Translation coming soon for this language.
Source edition (provenance)
perseus:tlg0059.tlg011.perseus-grc2; plato:symposium; section 210; transliteration: greek-transliteration (build)