Work 2 · Passage 72
Plato
Greek
ὃς γὰρ ἂν μέχρι ἐνταῦθα πρὸς τὰ ἐρωτικὰ παιδαγωγηθῇ, θεώμενος ἐφεξῆς τε καὶ ὀρθῶς τὰ καλά, πρὸς τέλος ἤδη ἰὼν τῶν ἐρωτικῶν ἐξαίφνης κατόψεταί τι θαυμαστὸν τὴν φύσιν καλόν, τοῦτο ἐκεῖνο, ὦ Σώκρατες, οὗ δὴ ἕνεκεν καὶ οἱ ἔμπροσθεν πάντες πόνοι ἦσαν, πρῶτον μὲν ἀεὶ ὂν καὶ οὔτε γιγνόμενον οὔτε ἀπολλύμενον, οὔτε αὐξανόμενον οὔτε φθίνον, ἔπειτα οὐ τῇ μὲν καλόν, τῇ δʼ αἰσχρόν, οὐδὲ τοτὲ μέν, τοτὲ δὲ οὔ, οὐδὲ πρὸς μὲν τὸ καλόν, πρὸς δὲ τὸ αἰσχρόν, οὐδʼ ἔνθα μὲν καλόν, ἔνθα δὲ αἰσχρόν, ὡς τισὶ μὲν ὂν καλόν, τισὶ δὲ αἰσχρόν· οὐδʼ αὖ φαντασθήσεται αὐτῷ τὸ καλὸν οἷον πρόσωπόν τι οὐδὲ χεῖρες οὐδὲ ἄλλο οὐδὲν ὧν σῶμα μετέχει, οὐδέ τις λόγος οὐδέ τις ἐπιστήμη, οὐδέ που ὂν ἐν ἑτέρῳ τινι, οἷον ἐν ζῴῳ ἢ ἐν γῇ ἢ ἐν οὐρανῷ ἢ ἔν τῳ ἄλλῳ, ἀλλʼ αὐτὸ καθʼ αὑτὸ μεθʼ αὑτοῦ μονοειδὲς ἀεὶ ὄν, τὰ δὲ ἄλλα πάντα καλὰ ἐκείνου μετέχοντα τρόπον τινὰ τοιοῦτον, οἷον γιγνομένων τε τῶν ἄλλων καὶ ἀπολλυμένων μηδὲν ἐκεῖνο μήτε τι πλέον μήτε ἔλαττον γίγνεσθαι μηδὲ πάσχειν μηδέν. ὅταν δή τις ἀπὸ τῶνδε διὰ τὸ ὀρθῶς παιδεραστεῖν ἐπανιὼν ἐκεῖνο τὸ καλὸν ἄρχηται καθορᾶν, σχεδὸν ἄν τι ἅπτοιτο τοῦ τέλους. τοῦτο γὰρ δή ἐστι τὸ ὀρθῶς ἐπὶ τὰ ἐρωτικὰ ἰέναι ἢ ὑπʼ ἄλλου ἄγεσθαι, ἀρχόμενον ἀπὸ τῶνδε τῶν καλῶν ἐκείνου ἕνεκα τοῦ καλοῦ ἀεὶ ἐπανιέναι, ὥσπερ ἐπαναβασμοῖς χρώμενον, ἀπὸ ἑνὸς ἐπὶ δύο καὶ ἀπὸ δυοῖν ἐπὶ πάντα τὰ καλὰ σώματα, καὶ ἀπὸ τῶν καλῶν σωμάτων ἐπὶ τὰ καλὰ ἐπιτηδεύματα, καὶ ἀπὸ τῶν ἐπιτηδευμάτων ἐπὶ τὰ καλὰ μαθήματα, καὶ ἀπὸ τῶν μαθημάτων ἐπʼ ἐκεῖνο τὸ μάθημα τελευτῆσαι, ὅ ἐστιν οὐκ ἄλλου ἢ αὐτοῦ ἐκείνου τοῦ καλοῦ μάθημα, καὶ γνῷ αὐτὸ τελευτῶν ὃ ἔστι καλόν. ἐνταῦθα τοῦ βίου, ὦ φίλε Σώκρατες, ἔφη ἡ Μαντινικὴ ξένη, εἴπερ που ἄλλοθι, βιωτὸν ἀνθρώπῳ, θεωμένῳ αὐτὸ τὸ καλόν
Transliteration
hos gar an mechri entautha pros ta erōtika paidagōgēthē, theōmenos ephexēs te kai orthōs ta kala, pros telos ēdē iōn tōn erōtikōn exaiphnēs katopsetai ti thaumaston tēn physin kalon, touto ekeino, ō Sōkrates, hou dē heneken kai hoi emprosthen pantes ponoi ēsan, prōton men aei on kai oute gignomenon oute apollymenon, oute auxanomenon oute phthinon, epeita ou tē men kalon, tē dʼ aischron, oude tote men, tote de ou, oude pros men to kalon, pros de to aischron, oudʼ entha men kalon, entha de aischron, hōs tisi men on kalon, tisi de aischron oudʼ au phantasthēsetai autō to kalon hoion prosōpon ti oude cheires oude allo ouden hōn sōma metechei, oude tis logos oude tis epistēmē, oude pou on en heterō tini, hoion en zōō ē en gē ē en ouranō ē en tō allō, allʼ auto kathʼ hauto methʼ hautou monoeides aei on, ta de alla panta kala ekeinou metechonta tropon tina toiouton, hoion gignomenōn te tōn allōn kai apollymenōn mēden ekeino mēte ti pleon mēte elatton gignesthai mēde paschein mēden. hotan dē tis apo tōnde dia to orthōs paiderastein epaniōn ekeino to kalon archētai kathoran, schedon an ti haptoito tou telous. touto gar dē esti to orthōs epi ta erōtika ienai ē hypʼ allou agesthai, archomenon apo tōnde tōn kalōn ekeinou heneka tou kalou aei epanienai, hōsper epanabasmois chrōmenon, apo henos epi dyo kai apo dyoin epi panta ta kala sōmata, kai apo tōn kalōn sōmatōn epi ta kala epitēdeumata, kai apo tōn epitēdeumatōn epi ta kala mathēmata, kai apo tōn mathēmatōn epʼ ekeino to mathēma teleutēsai, ho estin ouk allou ē autou ekeinou tou kalou mathēma, kai gnō auto teleutōn ho esti kalon. entautha tou biou, ō phile Sōkrates, ephē hē Mantinikē xenē, eiper pou allothi, biōton anthrōpō, theōmenō auto to kalon
Translation coming soon for this language.
Source edition (provenance)
perseus:tlg0059.tlg011.perseus-grc2; plato:symposium; section 211 part 1; transliteration: greek-transliteration (build)