Languages

Work 3 · Passage 106

Work 3 · Passage 106

Plato

Greek

ΦΑΙΔ. ἥδε μὲν γὰρ ἡ γῆ καὶ οἱ λίθοι καὶ ἅπας ὁ τόπος ὁ ἐνθάδε διεφθαρμένα ἐστὶν καὶ καταβεβρωμένα, ὥσπερ τὰ ἐν τῇ θαλάττῃ ὑπὸ τῆς ἅλμης, καὶ οὔτε φύεται ἄξιον λόγου οὐδὲν ἐν τῇ θαλάττῃ, οὔτε τέλειον ὡς ἔπος εἰπεῖν οὐδέν ἐστι, σήραγγες δὲ καὶ ἄμμος καὶ πηλὸς ἀμήχανος καὶ βόρβοροί εἰσιν, ὅπου ἂν καὶ γῆ ᾖ, καὶ πρὸς τὰ παρ’ ἡμῖν κάλλη κρίνεσθαι οὐδ’ ὁπωστιοῦν ἄξια. ἐκεῖνα δὲ αὖ τῶν παρ’ ἡμῖν πολὺ ἂν ἔτι πλέον φανείη διαφέρειν· εἰ γὰρ δὴ καὶ μῦθον λέγειν καλόν, ἄξιον ἀκοῦσαι, ὦ Σιμμία , οἷα τυγχάνει τὰ ἐπὶ τῆς γῆς ὑπὸ τῷ οὐρανῷ ὄντα. ἀλλὰ μήν, ἔφη ὁ Σιμμίας , ὦ Σώκρατες , ἡμεῖς γε τούτου τοῦ μύθου ἡδέως ἂν ἀκούσαιμεν. λέγεται τοίνυν, ἔφη, ὦ ἑταῖρε, πρῶτον μὲν εἶναι τοιαύτη ἡ γῆ αὐτὴ ἰδεῖν, εἴ τις ἄνωθεν θεῷτο, ὥσπερ αἱ δωδεκάσκυτοι σφαῖραι, ποικίλη, χρώμασιν διειλημμένη, ὧν καὶ τὰ ἐνθάδε εἶναι χρώματα ὥσπερ δείγματα, οἷς δὴ οἱ γραφῆς καταχρῶνται. ἐκεῖ δὲ πᾶσαν τὴν γῆν ἐκ τοιούτων εἶναι, καὶ πολὺ ἔτι ἐκ λαμπροτέρων καὶ καθαρωτέρων ἢ τούτων· τὴν μὲν γὰρ ἁλουργῆ εἶναι θαυμαστὴν τὸ κάλλος, τὴν δὲ χρυσοειδῆ, τὴν δὲ ὅση λευκὴ γύψου ἢ χιόνος λευκοτέραν, καὶ ἐκ τῶν ἄλλων χρωμάτων συγκειμένην ὡσαύτως, καὶ ἔτι πλειόνων καὶ καλλιόνων ἢ ὅσα ἡμεῖς ἑωράκαμεν. καὶ γὰρ αὐτὰ ταῦτα τὰ κοῖλα αὐτῆς, ὕδατός τε καὶ ἀέρος ἔκπλεα ὄντα, χρώματός τι εἶδος παρέχεσθαι στίλβοντα ἐν τῇ τῶν ἄλλων χρωμάτων ποικιλίᾳ, ὥστε ἕν τι αὐτῆς εἶδος συνεχὲς ποικίλον φαντάζεσθαι. ἐν δὲ ταύτῃ οὔσῃ τοιαύτῃ ἀνὰ λόγον τὰ φυόμενα φύεσθαι, δένδρα τε καὶ ἄνθη καὶ τοὺς καρπούς· καὶ αὖ τὰ ὄρη ὡσαύτως καὶ τοὺς λίθους ἔχειν ἀνὰ τὸν αὐτὸν λόγον τήν τε λειότητα καὶ τὴν διαφάνειαν καὶ τὰ χρώματα καλλίω· ὧν καὶ τὰ ἐνθάδε λιθίδια εἶναι ταῦτα τὰ ἀγαπώμενα μόρια, σάρδιά τε καὶ ἰάσπιδας καὶ σμαράγδους καὶ πάντα τὰ τοιαῦτα

Transliteration

PHAID. hēde men gar hē gē kai hoi lithoi kai hapas ho topos ho enthade diephtharmena estin kai katabebrōmena, hōsper ta en tē thalattē hypo tēs halmēs, kai oute phyetai axion logou ouden en tē thalattē, oute teleion hōs epos eipein ouden esti, sēranges de kai ammos kai pēlos amēchanos kai borboroi eisin, hopou an kai gē ē, kai pros ta par’ hēmin kallē krinesthai oud’ hopōstioun axia. ekeina de au tōn par’ hēmin poly an eti pleon phaneiē diapherein ei gar dē kai mython legein kalon, axion akousai, ō Simmia , hoia tynchanei ta epi tēs gēs hypo tō ouranō onta. alla mēn, ephē ho Simmias , ō Sōkrates , hēmeis ge toutoy tou mythou hēdeōs an akousaimen. legetai toinyn, ephē, ō hetaire, prōton men einai toiautē hē gē autē idein, ei tis anōthen theōto, hōsper hai dōdekaskytoi sphairai, poikilē, chrōmasin dieilēmmenē, hōn kai ta enthade einai chrōmata hōsper deigmata, hois dē hoi graphēs katachrōntai. ekei de pasan tēn gēn ek toioutōn einai, kai poly eti ek lamproterōn kai katharōterōn ē toutōn tēn men gar halourgē einai thaumastēn to kallos, tēn de chrysoeidē, tēn de hosē leukē gypsou ē chionos leukoteran, kai ek tōn allōn chrōmatōn synkeimenēn hōsautōs, kai eti pleionōn kai kallionōn ē hosa hēmeis heōrakamen. kai gar auta tauta ta koila autēs, hydatos te kai aeros ekplea onta, chrōmatos ti eidos parechesthai stilbonta en tē tōn allōn chrōmatōn poikilia, hōste hen ti autēs eidos syneches poikilon phantazesthai. en de tautē ousē toiautē ana logon ta phyomena phyesthai, dendra te kai anthē kai tous karpous kai au ta orē hōsautōs kai tous lithous echein ana ton auton logon tēn te leiotēta kai tēn diaphaneian kai ta chrōmata kalliō hōn kai ta enthade lithidia einai tauta ta agapōmena moria, sardia te kai iaspidas kai smaragdous kai panta ta toiauta

Translation coming soon for this language.

Source edition (provenance)

perseus:tlg0059.tlg004.perseus-grc2; plato:phaedo; section 110 part 1; transliteration: greek-transliteration (build)

Share X Facebook