Languages

Work 4 · Passage 71

Work 4 · Passage 71

Plato

Greek

ΦΑΙ. τὸ ποῖον δὴ λέγεις; ΣΩ. ἐναντίω που ἤστην· ὁ μὲν γὰρ ὡς τῷ ἐρῶντι, ὁ δʼ ὡς τῷ μὴ δεῖ χαρίζεσθαι, ἐλεγέτην. ΦΑΙ. καὶ μάλʼ ἀνδρικῶς. ΣΩ. ὤιμην σε τἀληθὲς ἐρεῖν, ὅτι μανικῶς· ὃ μέντοι ἐζήτουν ἐστὶν αὐτὸ τοῦτο. μανίαν γάρ τινα ἐφήσαμεν εἶναι τὸν ἔρωτα. ἦ γάρ; ΦΑΙ. ναί. ΣΩ. μανίας δέ γε εἴδη δύο, τὴν μὲν ὑπὸ νοσημάτων ἀνθρωπίνων, τὴν δὲ ὑπὸ θείας ἐξαλλαγῆς τῶν εἰωθότων νομίμων γιγνομένην. ΦΑΙ. πάνυ γε. ΣΩ. τῆς δὲ θείας τεττάρων θεῶν τέτταρα μέρη διελόμενοι, μαντικὴν μὲν ἐπίπνοιαν Ἀπόλλωνος θέντες, Διονύσου δὲ τελεστικήν, Μουσῶν δʼ αὖ ποιητικήν, τετάρτην δὲ ἀφροδίτης καὶ Ἔρωτος, ἐρωτικὴν μανίαν ἐφήσαμέν τε ἀρίστην εἶναι, καὶ οὐκ οἶδʼ ὅπῃ τὸ ἐρωτικὸν πάθος ἀπεικάζοντες, ἴσως μὲν ἀληθοῦς τινος ἐφαπτόμενοι, τάχα δʼ ἂν καὶ ἄλλοσε παραφερόμενοι, κεράσαντες οὐ παντάπασιν ἀπίθανον λόγον, μυθικόν τινα ὕμνον προσεπαίσαμεν μετρίως τε καὶ εὐφήμως τὸν ἐμόν τε καὶ σὸν δεσπότην ἔρωτα, ὦ Φαῖδρε, καλῶν παίδων ἔφορον. ΦΑΙ. καὶ μάλα ἔμοιγε οὐκ ἀηδῶς ἀκοῦσαι. ΣΩ. τόδε τοίνυν αὐτόθεν λάβωμεν, ὡς ἀπὸ τοῦ ψέγειν πρὸς τὸ ἐπαινεῖν ἔσχεν ὁ λόγος μεταβῆναι. ΦΑΙ. πῶς δὴ οὖν αὐτὸ λέγεις; ΣΩ. ἐμοὶ μὲν φαίνεται τὰ μὲν ἄλλα τῷ ὄντι παιδιᾷ πεπαῖσθαι· τούτων δέ τινων ἐκ τύχης ῥηθέντων δυοῖν εἰδοῖν, εἰ αὐτοῖν τὴν δύναμιν τέχνῃ λαβεῖν δύναιτό τις, οὐκ ἄχαρι. ΦΑΙ. τίνων δή; ΣΩ. εἰς μίαν τε ἰδέαν συνορῶντα ἄγειν τὰ πολλαχῇ διεσπαρμένα, ἵνα ἕκαστον ὁριζόμενος δῆλον ποιῇ περὶ οὗ ἂν ἀεὶ διδάσκειν ἐθέλῃ. ὥσπερ τὰ νυνδὴ περὶ Ἔρωτος—ὃ ἔστιν ὁρισθέν—εἴτʼ εὖ εἴτε κακῶς ἐλέχθη, τὸ γοῦν σαφὲς καὶ τὸ αὐτὸ αὑτῷ ὁμολογούμενον διὰ ταῦτα ἔσχεν εἰπεῖν ὁ λόγος. ΦΑΙ. τὸ δʼ ἕτερον δὴ εἶδος τί λέγεις, ὦ Σώκρατες;

Transliteration

PHAI. to poion dē legeis; SŌ. enantiō pou ēstēn ho men gar hōs tō erōnti, ho dʼ hōs tō mē dei charizesthai, elegetēn. PHAI. kai malʼ andrikōs. SŌ. ōimēn se talēthes erein, hoti manikōs ho mentoi ezētoun estin auto touto. manian gar tina ephēsamen einai ton erōta. ē gar; PHAI. nai. SŌ. manias de ge eidē dyo, tēn men hypo nosēmatōn anthrōpinōn, tēn de hypo theias exallagēs tōn eiōthotōn nomimōn gignomenēn. PHAI. pany ge. SŌ. tēs de theias tettarōn theōn tettara merē dielomenoi, mantikēn men epipnoian Apollōnos thentes, Dionysou de telestikēn, Mousōn dʼ au poiētikēn, tetartēn de aphroditēs kai Erōtos, erōtikēn manian ephēsamen te aristēn einai, kai ouk oidʼ hopē to erōtikon pathos apeikazontes, isōs men alēthous tinos ephaptomenoi, tacha dʼ an kai allose parapheromenoi, kerasantes ou pantapasin apithanon logon, mythikon tina hymnon prosepaisamen metriōs te kai euphēmōs ton emon te kai son despotēn erōta, ō PHaidre, kalōn paidōn ephoron. PHAI. kai mala emoige ouk aēdōs akousai. SŌ. tode toinyn autothen labōmen, hōs apo tou psegein pros to epainein eschen ho logos metabēnai. PHAI. pōs dē oun auto legeis; SŌ. emoi men phainetai ta men alla tō onti paidia pepaisthai toutōn de tinōn ek tychēs rhēthentōn dyoin eidoin, ei autoin tēn dynamin technē labein dynaito tis, ouk achari. PHAI. tinōn dē; SŌ. eis mian te idean synorōnta agein ta pollachē diesparmena, hina hekaston horizomenos dēlon poiē peri hou an aei didaskein ethelē. hōsper ta nyndē peri hErōtos—o estin horisthen—eitʼ eu eite kakōs elechthē, to goun saphes kai to auto hautō homologoumenon dia tauta eschen eipein ho logos. PHAI. to dʼ heteron dē eidos ti legeis, ō Sōkrates;

Translation coming soon for this language.

Source edition (provenance)

perseus:tlg0059.tlg012.perseus-grc2; plato:phaedrus; section 265; transliteration: greek-transliteration (build)

Share X Facebook