Work 1 · Passage 22
Aristotle
Greek
τὰς δὲ τῶν ἀπογόνων τύχας καὶ τῶν φίλων ἁπάντων τὸ μὲν μηδοτιοῦν συμβάλλεσθαι λίαν ἄφιλον φαίνεται καὶ ταῖς δόξαις ἐναντίον· πολλῶν δὲ καὶ παντοίας ἐχόντων διαφορὰς τῶν συμβαινόντων, καὶ τῶν μὲν μᾶλλον συνικνουμένων τῶν δʼ ἧττον, καθʼ ἕκαστον μὲν διαιρεῖν μακρὸν καὶ ἀπέραντον φαίνεται, καθόλου δὲ λεχθὲν καὶ τύπῳ τάχʼ ἂν ἱκανῶς ἔχοι. εἰ δή, καθάπερ καὶ τῶν περὶ αὑτὸν ἀτυχημάτων τὰ μὲν ἔχει τι βρῖθος καὶ ῥοπὴν πρὸς τὸν βίον τὰ δʼ ἐλαφροτέροις ἔοικεν, οὕτω καὶ τὰ περὶ τοὺς φίλους ὁμοίως ἅπαντας, διαφέρει δὲ τῶν παθῶν ἕκαστον περὶ ζῶντας ἢ τελευτήσαντας συμβαίνειν πολὺ μᾶλλον ἢ τὰ παράνομα καὶ δεινὰ προϋπάρχειν ἐν ταῖς τραγῳδίαις ἢ πράττεσθαι, συλλογιστέον δὴ καὶ ταύτην τὴν διαφοράν, μᾶλλον δʼ ἴσως τὸ διαπορεῖσθαι περὶ τοὺς κεκμηκότας εἴ τινος ἀγαθοῦ κοινωνοῦσιν ἢ τῶν ἀντικειμένων. ἔοικε γὰρ ἐκ τούτων εἰ καὶ διικνεῖται πρὸς αὐτοὺς ὁτιοῦν, εἴτʼ ἀγαθὸν εἴτε τοὐναντίον, ἀφαυρόν τι καὶ μικρὸν ἢ ἁπλῶς ἢ ἐκείνοις εἶναι, εἰ δὲ μή, τοσοῦτόν γε καὶ τοιοῦτον ὥστε μὴ ποιεῖν εὐδαίμονας τοὺς μὴ ὄντας μηδὲ τοὺς ὄντας ἀφαιρεῖσθαι τὸ μακάριον. συμβάλλεσθαι μὲν οὖν τι φαίνονται τοῖς κεκμηκόσιν αἱ εὐπραξίαι τῶν φίλων, ὁμοίως δὲ καὶ αἱ δυσπραξίαι, τοιαῦτα δὲ καὶ τηλικαῦτα ὥστε μήτε τοὺς εὐδαίμονας μὴ εὐδαίμονας ποιεῖν μήτʼ ἄλλο τῶν τοιούτων μηδέν.
Transliteration
tas de ton apogonon tychas kai ton philon hapanton to men medotioun symballesthai lian aphilon phainetai kai tais doxais enantion pollon de kai pantoias echonton diaphoras ton symbainonton, kai ton men mallon syniknoumenon ton dʼ hetton, kathʼ hekaston men diairein makron kai aperanton phainetai, katholou de lechthen kai typo tachʼ an hikanos echoi. ei de, kathaper kai ton peri hauton atychematon ta men echei ti brithos kai rhopen pros ton bion ta dʼ elaphroterois eoiken, houto kai ta peri tous philous homoios hapantas, diapherei de ton pathon hekaston peri zontas e teleutesantas symbainein poly mallon e ta paranoma kai deina proyparchein en tais tragodiais e prattesthai, syllogisteon de kai tauten ten diaphoran, mallon dʼ isos to diaporeisthai peri tous kekmekotas ei tinos agathou koinonousin e ton antikeimenon. eoike gar ek touton ei kai diikneitai pros autous hotioun, eitʼ agathon eite tounantion, aphauron ti kai mikron e haplos e ekeinois einai, ei de me, tosouton ge kai toiouton hoste me poiein eudaimonas tous me ontas mede tous ontas aphaireisthai to makarion. symballesthai men oun ti phainontai tois kekmekosin hai eupraxiai ton philon, homoios de kai hai dyspraxiai, toiauta de kai telikauta hoste mete tous eudaimonas me eudaimonas poiein metʼ allo ton toiouton meden.
Translation coming soon for this language.
Source edition (provenance)
perseus:tlg0086.tlg010.perseus-grc2; aristotle:ne; book 1 section 11; bekker 1101b; transliteration: greek-transliteration (build)