Work 1 · Passage 23
Aristotle
Greek
διωρισμένων δὲ τούτων ἐπισκεψώμεθα περὶ τῆς εὐδαιμονίας πότερα τῶν ἐπαινετῶν ἐστὶν ἢ μᾶλλον τῶν τιμίων· δῆλον γὰρ ὅτι τῶν γε δυνάμεων οὐκ ἔστιν. φαίνεται δὴ πᾶν τὸ ἐπαινετὸν τῷ ποιόν τι εἶναι καὶ πρός τι πῶς ἔχειν ἐπαινεῖσθαι· τὸν γὰρ δίκαιον καὶ τὸν ἀνδρεῖον καὶ ὅλως τὸν ἀγαθόν τε καὶ τὴν ἀρετὴν ἐπαινοῦμεν διὰ τὰς πράξεις καὶ τὰ ἔργα, καὶ τὸν ἰσχυρὸν δὲ καὶ τὸν δρομικὸν καὶ τῶν ἄλλων ἕκαστον τῷ ποιόν τινα πεφυκέναι καὶ ἔχειν πως πρὸς ἀγαθόν τι καὶ σπουδαῖον. δῆλον δὲ τοῦτο καὶ ἐκ τῶν περὶ τοὺς θεοὺς ἐπαίνων· γελοῖοι γὰρ φαίνονται πρὸς ἡμᾶς ἀναφερόμενοι, τοῦτο δὲ συμβαίνει διὰ τὸ γίνεσθαι τοὺς ἐπαίνους διʼ ἀναφορᾶς, ὥσπερ εἴπομεν. εἰ δʼ ἐστὶν ὁ ἔπαινος τῶν τοιούτων, δῆλον ὅτι τῶν ἀρίστων οὐκ ἔστιν ἔπαινος, ἀλλὰ μεῖζόν τι καὶ βέλτιον, καθάπερ καὶ φαίνεται· τούς τε γὰρ θεοὺς μακαρίζομεν καὶ εὐδαιμονίζομεν καὶ τῶν ἀνδρῶν τοὺς θειοτάτους . ὁμοίως δὲ καὶ τῶν ἀγαθῶν· οὐδεὶς γὰρ τὴν εὐδαιμονίαν ἐπαινεῖ καθάπερ τὸ δίκαιον, ἀλλʼ ὡς θειότερόν τι καὶ βέλτιον μακαρίζει. δοκεῖ δὲ καὶ Εὔδοξος καλῶς συνηγορῆσαι περὶ τῶν ἀριστείων τῇ ἡδονῇ· τὸ γὰρ μὴ ἐπαινεῖσθαι τῶν ἀγαθῶν οὖσαν μηνύειν ᾤετο ὅτι κρεῖττόν ἐστι τῶν ἐπαινετῶν, τοιοῦτον δʼ εἶναι τὸν θεὸν καὶ τἀγαθόν· πρὸς ταῦτα γὰρ καὶ τἆλλα ἀναφέρεσθαι. ὁ μὲν γὰρ ἔπαινος τῆς ἀρετῆς· πρακτικοὶ γὰρ τῶν καλῶν ἀπὸ ταύτης· τὰ δʼ ἐγκώμια τῶν ἔργων ὁμοίως καὶ τῶν σωματικῶν καὶ τῶν ψυχικῶν. ἀλλὰ ταῦτα μὲν ἴσως οἰκειότερον ἐξακριβοῦν τοῖς περὶ τὰ ἐγκώμια πεπονημένοις· ἡμῖν δὲ δῆλον ἐκ τῶν εἰρημένων ὅτι ἐστὶν ἡ εὐδαιμονία τῶν τιμίων καὶ τελείων. ἔοικε δʼ οὕτως ἔχειν καὶ διὰ τὸ εἶναι ἀρχή· ταύτης γὰρ χάριν τὰ λοιπὰ πάντα πάντες πράττομεν, τὴν ἀρχὴν δὲ καὶ τὸ αἴτιον τῶν ἀγαθῶν τίμιόν τι καὶ θεῖον τίθεμεν.
Transliteration
diorismenon de touton episkepsometha peri tes eudaimonias potera ton epaineton estin e mallon ton timion delon gar hoti ton ge dynameon ouk estin. phainetai de pan to epaineton to poion ti einai kai pros ti pos echein epaineisthai ton gar dikaion kai ton andreion kai holos ton agathon te kai ten areten epainoumen dia tas praxeis kai ta erga, kai ton ischyron de kai ton dromikon kai ton allon hekaston to poion tina pephykenai kai echein pos pros agathon ti kai spoudaion. delon de touto kai ek ton peri tous theous epainon geloioi gar phainontai pros hemas anapheromenoi, touto de symbainei dia to ginesthai tous epainous diʼ anaphoras, hosper eipomen. ei dʼ estin ho epainos ton toiouton, delon hoti ton ariston ouk estin epainos, alla meizon ti kai beltion, kathaper kai phainetai tous te gar theous makarizomen kai eudaimonizomen kai ton andron tous theiotatous . homoios de kai ton agathon oudeis gar ten eudaimonian epainei kathaper to dikaion, allʼ hos theioteron ti kai beltion makarizei. dokei de kai Eydoxos kalos synegoresai peri ton aristeion te hedone to gar me epaineisthai ton agathon ousan menyein oeto hoti kreitton esti ton epaineton, toiouton dʼ einai ton theon kai tagathon pros tauta gar kai talla anapheresthai. ho men gar epainos tes aretes praktikoi gar ton kalon apo tautes ta dʼ enkomia ton ergon homoios kai ton somatikon kai ton psychikon. alla tauta men isos oikeioteron exakriboun tois peri ta enkomia peponemenois hemin de delon ek ton eiremenon hoti estin he eudaimonia ton timion kai teleion. eoike dʼ houtos echein kai dia to einai arche tautes gar charin ta loipa panta pantes prattomen, ten archen de kai to aition ton agathon timion ti kai theion tithemen.
Translation coming soon for this language.
Source edition (provenance)
perseus:tlg0086.tlg010.perseus-grc2; aristotle:ne; book 1 section 12; bekker 1102a; transliteration: greek-transliteration (build)