Languages

Work 3 · Passage 21

Work 3 · Passage 21

Aristotle

Greek

· διὰ γὰρ τὸ πολλάκις καὶ πολλοὺς νενικηκέναι θαρροῦσιν ἐν τοῖς κινδύνοις· παρόμοιοι δέ, ὅτι ἄμφω θαρραλέοι· ἀλλʼ οἱ μὲν ἀνδρεῖοι διὰ τὰ πρότερον εἰρημένα θαρραλέοι, οἳ δὲ διὰ τὸ οἴεσθαι κράτιστοι εἶναι καὶ μηθὲν ἂν παθεῖν. τοιοῦτον δὲ ποιοῦσι καὶ οἱ μεθυσκόμενοι· εὐέλπιδες γὰρ γίνονται. ὅταν δὲ αὐτοῖς μὴ συμβῇ τὰ τοιαῦτα, φεύγουσιν· ἀνδρείου δʼ ἦν τὰ φοβερὰ ἀνθρώπῳ ὄντα καὶ φαινόμενα ὑπομένειν, ὅτι καλὸν καὶ αἰσχρὸν τὸ μή. διὸ καὶ ἀνδρειοτέρου δοκεῖ εἶναι τὸ ἐν τοῖς αἰφνιδίοις φόβοις ἄφοβον καὶ ἀτάραχον εἶναι ἢ ἐν τοῖς προδήλοις· ἀπὸ ἕξεως γὰρ μᾶλλον ἦν, ὅτι ἧττον ἐκ παρασκευῆς· τὰ προφανῆ μὲν γὰρ κἂν ἐκ λογισμοῦ καὶ λόγου τις προέλοιτο, τὰ δʼ ἐξαίφνης κατὰ τὴν ἕξιν. ἀνδρεῖοι δὲ φαίνονται καὶ οἱ ἀγνοοῦντες, καὶ εἰσὶν οὐ πόρρω τῶν εὐελπίδων, χείρους δʼ ὅσῳ ἀξίωμα οὐδὲν ἔχουσιν, ἐκεῖνοι δέ. διὸ καὶ μένουσί τινα χρόνον· οἱ δʼ ἠπατημένοι, ἐὰν γνῶσιν ὅτι ἕτερον ἢ ὑποπτεύσωσι, φεύγουσιν· ὅπερ οἱ Ἀργεῖοι ἔπαθον περιπεσόντες τοῖς Λάκωσιν ὡς Σικυωνίοις. οἵ τε δὴ ἀνδρεῖοι εἴρηνται ποῖοί τινες, καὶ οἱ δοκοῦντες ἀνδρεῖοι.

Transliteration

dia gar to pollakis kai pollous nenikekenai tharrhousin en tois kindynois paromoioi de, hoti ampho tharrhaleoi allʼ hoi men andreioi dia ta proteron eiremena tharrhaleoi, hoi de dia to oiesthai kratistoi einai kai methen an pathein. toiouton de poiousi kai hoi methyskomenoi euelpides gar ginontai. hotan de autois me symbe ta toiauta, pheugousin andreiou dʼ en ta phobera anthropo onta kai phainomena hypomenein, hoti kalon kai aischron to me. dio kai andreioterou dokei einai to en tois aiphnidiois phobois aphobon kai atarachon einai e en tois prodelois apo hexeos gar mallon en, hoti hetton ek paraskeues ta prophane men gar kan ek logismou kai logou tis proeloito, ta dʼ exaiphnes kata ten hexin. andreioi de phainontai kai hoi agnoountes, kai eisin ou porrho ton euelpidon, cheirous dʼ hoso axioma ouden echousin, ekeinoi de. dio kai menousi tina chronon hoi dʼ epatemenoi, ean gnosin hoti heteron e hypopteusosi, pheugousin hoper hoi Argeioi epathon peripesontes tois Lakosin hos Sikyoniois. hoi te de andreioi eirentai poioi tines, kai hoi dokountes andreioi.

Translation coming soon for this language.

Source edition (provenance)

perseus:tlg0086.tlg010.perseus-grc2; aristotle:ne; book 3 section 8 part 3; bekker 1116b; transliteration: greek-transliteration (build)

Share X Facebook