Work 3 · Passage 26
Aristotle
Greek
· ἀτόπῳ δʼ ἔοικε τὸ διʼ ἡδονὴν λυπεῖσθαι. ἐλλείποντες δὲ τὰ περὶ τὰς ἡδονὰς καὶ ἧττον ἢ δεῖ χαίροντες οὐ πάνυ γίνονται· οὐ γὰρ ἀνθρωπική ἐστιν ἡ τοιαύτη ἀναισθησία· καὶ γὰρ τὰ λοιπὰ ζῷα διακρίνει τὰ βρώματα, καὶ τοῖς μὲν χαίρει τοῖς δʼ οὔ· εἰ δέ τῳ μηδέν ἐστιν ἡδὺ μηδὲ διαφέρει ἕτερον ἑτέρου, πόρρω ἂν εἴη τοῦ ἄνθρωπος εἶναι· οὐ τέτευχε δʼ ὁ τοιοῦτος ὀνόματος διὰ τὸ μὴ πάνυ γίνεσθαι. ὁ δὲ σώφρων μέσως μὲν περὶ ταῦτʼ ἔχει· οὔτε γὰρ ἥδεται οἷς μάλιστα ὁ ἀκόλαστος, ἀλλὰ μᾶλλον δυσχεραίνει, οὐδʼ ὅλως οἷς μὴ δεῖ οὐδὲ σφόδρα τοιούτῳ οὐδενί, οὔτʼ ἀπόντων λυπεῖται οὐδʼ ἐπιθυμεῖ, ἢ μετρίως, οὐδὲ μᾶλλον ἢ δεῖ, οὐδʼ ὅτε μὴ δεῖ, οὐδʼ ὅλως τῶν τοιούτων οὐδέν· ὅσα δὲ πρὸς ὑγίειάν ἐστιν ἢ πρὸς εὐεξίαν ἡδέα ὄντα, τούτων ὀρέξεται μετρίως καὶ ὡς δεῖ, καὶ τῶν ἄλλων ἡδέων μὴ ἐμποδίων τούτοις ὄντων ἢ παρὰ τὸ καλὸν ἢ ὑπὲρ τὴν οὐσίαν. ὁ γὰρ οὕτως ἔχων μᾶλλον ἀγαπᾷ τὰς τοιαύτας ἡδονὰς τῆς ἀξίας· ὁ δὲ σώφρων οὐ τοιοῦτος, ἀλλʼ ὡς ὁ ὀρθὸς λόγος.
Transliteration
atopo dʼ eoike to diʼ hedonen lypeisthai. elleipontes de ta peri tas hedonas kai hetton e dei chairontes ou pany ginontai ou gar anthropike estin he toiaute anaisthesia kai gar ta loipa zoa diakrinei ta bromata, kai tois men chairei tois dʼ ou ei de to meden estin hedy mede diapherei heteron heterou, porrho an eie tou anthropos einai ou teteuche dʼ ho toioutos onomatos dia to me pany ginesthai. ho de sophron mesos men peri tautʼ echei oute gar hedetai hois malista ho akolastos, alla mallon dyscherainei, oudʼ holos hois me dei oude sphodra toiouto oudeni, outʼ aponton lypeitai oudʼ epithymei, e metrios, oude mallon e dei, oudʼ hote me dei, oudʼ holos ton toiouton ouden hosa de pros hygieian estin e pros euexian hedea onta, touton orexetai metrios kai hos dei, kai ton allon hedeon me empodion toutois onton e para to kalon e hyper ten ousian. ho gar houtos echon mallon agapa tas toiautas hedonas tes axias ho de sophron ou toioutos, allʼ hos ho orthos logos.
Translation coming soon for this language.
Source edition (provenance)
perseus:tlg0086.tlg010.perseus-grc2; aristotle:ne; book 3 section 11 part 2; bekker 1119a; transliteration: greek-transliteration (build)