Languages

Work 2 · Passage 16

Work 2 · Passage 16

Plato

Greek

Αἰσχύλος δὲ φλυαρεῖ φάσκων Ἀχιλλέα Πατρόκλου ἐρᾶν, ὃς ἦν καλλίων οὐ μόνον Πατρόκλου ἀλλʼ ἅμα καὶ τῶν ἡρώων ἁπάντων, καὶ ἔτι ἀγένειος, ἔπειτα νεώτερος πολύ, ὥς φησιν Ὅμηρος. ἀλλὰ γὰρ τῷ ὄντι μάλιστα μὲν ταύτην τὴν ἀρετὴν οἱ θεοὶ τιμῶσιν τὴν περὶ τὸν ἔρωτα, μᾶλλον μέντοι θαυμάζουσιν καὶ ἄγανται καὶ εὖ ποιοῦσιν ὅταν ὁ ἐρώμενος τὸν ἐραστὴν ἀγαπᾷ, ἢ ὅταν ὁ ἐραστὴς τὰ παιδικά. θειότερον γὰρ ἐραστὴς παιδικῶν· ἔνθεος γάρ ἐστι. διὰ ταῦτα καὶ τὸν Ἀχιλλέα τῆς Ἀλκήστιδος μᾶλλον ἐτίμησαν, εἰς μακάρων νήσους ἀποπέμψαντες. οὕτω δὴ ἔγωγέ φημι ἔρωτα θεῶν καὶ πρεσβύτατον καὶ τιμιώτατον καὶ κυριώτατον εἶναι εἰς ἀρετῆς καὶ εὐδαιμονίας κτῆσιν ἀνθρώποις καὶ ζῶσι καὶ τελευτήσασιν. Φαῖδρον μὲν τοιοῦτόν τινα λόγον ἔφη εἰπεῖν, μετὰ δὲ Φαῖδρον ἄλλους τινὰς εἶναι ὧν οὐ πάνυ διεμνημόνευε· οὓς παρεὶς τὸν Παυσανίου λόγον διηγεῖτο. εἰπεῖν δʼ αὐτὸν ὅτι οὐ καλῶς μοι δοκεῖ, ὦ Φαῖδρε, προβεβλῆσθαι ἡμῖν ὁ λόγος, τὸ ἁπλῶς οὕτως παρηγγέλθαι ἐγκωμιάζειν ἔρωτα. εἰ μὲν γὰρ εἷς ἦν ὁ Ἔρως, καλῶς ἂν εἶχε, νῦν δὲ οὐ γάρ ἐστιν εἷς· μὴ ὄντος δὲ ἑνὸς ὀρθότερόν ἐστι πρότερον προρρηθῆναι ὁποῖον δεῖ ἐπαινεῖν. ἐγὼ οὖν πειράσομαι τοῦτο ἐπανορθώσασθαι, πρῶτον μὲν ἔρωτα φράσαι ὃν δεῖ ἐπαινεῖν, ἔπειτα ἐπαινέσαι ἀξίως τοῦ θεοῦ. πάντες γὰρ ἴσμεν ὅτι οὐκ ἔστιν ἄνευ Ἔρωτος Ἀφροδίτη. μιᾶς μὲν οὖν οὔσης εἷς ἂν ἦν Ἔρως· ἐπεὶ δὲ δὴ δύο ἐστόν, δύο ἀνάγκη καὶ Ἔρωτε εἶναι. πῶς δʼ οὐ δύο τὼ θεά; ἡ μέν γέ που πρεσβυτέρα καὶ ἀμήτωρ Οὐρανοῦ θυγάτηρ, ἣν δὴ καὶ Οὐρανίαν ἐπονομάζομεν· ἡ δὲ νεωτέρα Διὸς καὶ Διώνης, ἣν δὴ Πάνδημον καλοῦμεν. ἀναγκαῖον δὴ καὶ ἔρωτα τὸν μὲν τῇ ἑτέρᾳ συνεργὸν Πάνδημον ὀρθῶς καλεῖσθαι, τὸν δὲ Οὐράνιον. ἐπαινεῖν μὲν οὖν δεῖ πάντας θεούς, ἃ δʼ οὖν ἑκάτερος εἴληχε πειρατέον εἰπεῖν. πᾶσα γὰρ πρᾶξις ὧδʼ ἔχει· αὐτὴ ἐφʼ ἑαυτῆς πραττομένη οὔτε καλὴ οὔτε αἰσχρά.

Transliteration

Aischylos de phlyarei phaskōn Achillea Patroklou eran, hos ēn kalliōn ou monon Patroklou allʼ hama kai tōn hērōōn hapantōn, kai eti ageneios, epeita neōteros poly, hōs phēsin hOmēros. alla gar tō onti malista men tautēn tēn aretēn hoi theoi timōsin tēn peri ton erōta, mallon mentoi thaumazousin kai agantai kai eu poiousin hotan ho erōmenos ton erastēn agapa, ē hotan ho erastēs ta paidika. theioteron gar erastēs paidikōn entheos gar esti. dia tauta kai ton Achillea tēs Alkēstidos mallon etimēsan, eis makarōn nēsous apopempsantes. houtō dē egōge phēmi erōta theōn kai presbytaton kai timiōtaton kai kyriōtaton einai eis aretēs kai eudaimonias ktēsin anthrōpois kai zōsi kai teleutēsasin. PHaidron men toiouton tina logon ephē eipein, meta de PHaidron allous tinas einai hōn ou pany diemnēmoneue hous pareis ton Pausaniou logon diēgeito. eipein dʼ auton hoti ou kalōs moi dokei, ō PHaidre, probeblēsthai hēmin ho logos, to haplōs houtōs parēngelthai enkōmiazein erōta. ei men gar heis ēn ho Erōs, kalōs an eiche, nyn de ou gar estin heis mē ontos de henos orthoteron esti proteron prorrhēthēnai hopoion dei epainein. egō oun peirasomai touto epanorthōsasthai, prōton men erōta phrasai hon dei epainein, epeita epainesai axiōs tou theou. pantes gar ismen hoti ouk estin aneu Erōtos Aphroditē. mias men oun ousēs heis an ēn Erōs epei de dē dyo eston, dyo anankē kai Erōte einai. pōs dʼ ou dyo tō thea; hē men ge pou presbytera kai amētōr Oyranou thygatēr, hēn dē kai Oyranian eponomazomen hē de neōtera Dios kai Diōnēs, hēn dē Pandēmon kaloumen. anankaion dē kai erōta ton men tē hetera synergon Pandēmon orthōs kaleisthai, ton de Oyranion. epainein men oun dei pantas theous, ha dʼ oun hekateros eilēche peirateon eipein. pasa gar praxis hōdʼ echei autē ephʼ heautēs prattomenē oute kalē oute aischra.

Translation coming soon for this language.

Source edition (provenance)

perseus:tlg0059.tlg011.perseus-grc2; plato:symposium; section 180; transliteration: greek-transliteration (build)

Share X Facebook