Work 2 · Passage 24
Plato
Greek
εἰ γάρ τις ἐραστῇ ὡς πλουσίῳ πλούτου ἕνεκα χαρισάμενος ἐξαπατηθείη καὶ μὴ λάβοι χρήματα, ἀναφανέντος τοῦ ἐραστοῦ πένητος, οὐδὲν ἧττον αἰσχρόν· δοκεῖ γὰρ ὁ τοιοῦτος τό γε αὑτοῦ ἐπιδεῖξαι, ὅτι ἕνεκα χρημάτων ὁτιοῦν ἂν ὁτῳοῦν ὑπηρετοῖ, τοῦτο δὲ οὐ καλόν. κατὰ τὸν αὐτὸν δὴ λόγον κἂν εἴ τις ὡς ἀγαθῷ χαρισάμενος καὶ αὐτὸς ὡς ἀμείνων ἐσόμενος διὰ τὴν φιλίαν ἐραστοῦ ἐξαπατηθείη, ἀναφανέντος ἐκείνου κακοῦ καὶ οὐ κεκτημένου ἀρετήν, ὅμως καλὴ ἡ ἀπάτη· δοκεῖ γὰρ αὖ καὶ οὗτος τὸ καθʼ αὑτὸν δεδηλωκέναι, ὅτι ἀρετῆς γʼ ἕνεκα καὶ τοῦ βελτίων γενέσθαι πᾶν ἂν παντὶ προθυμηθείη, τοῦτο δὲ αὖ πάντων κάλλιστον· οὕτω πᾶν πάντως γε καλὸν ἀρετῆς γʼ ἕνεκα χαρίζεσθαι. οὗτός ἐστιν ὁ τῆς οὐρανίας θεοῦ ἔρως καὶ οὐράνιος καὶ πολλοῦ ἄξιος καὶ πόλει καὶ ἰδιώταις, πολλὴν ἐπιμέλειαν ἀναγκάζων ποιεῖσθαι πρὸς ἀρετὴν τόν τε ἐρῶντα αὐτὸν αὑτοῦ καὶ τὸν ἐρώμενον· οἱ δʼ ἕτεροι πάντες τῆς ἑτέρας, τῆς πανδήμου. ταῦτά σοι, ἔφη, ὡς ἐκ τοῦ παραχρῆμα, ὦ Φαῖδρε, περὶ Ἔρωτος συμβάλλομαι. Παυσανίου δὲ παυσαμένου—διδάσκουσι γάρ με ἴσα λέγειν οὑτωσὶ οἱ σοφοί—ἔφη ὁ Ἀριστόδημος δεῖν μὲν Ἀριστοφάνη λέγειν, τυχεῖν δὲ αὐτῷ τινα ἢ ὑπὸ πλησμονῆς ἢ ὑπό τινος ἄλλου λύγγα ἐπιπεπτωκυῖαν καὶ οὐχ οἷόν τε εἶναι λέγειν, ἀλλʼ εἰπεῖν αὐτόν—ἐν τῇ κάτω γὰρ αὐτοῦ τὸν ἰατρὸν Ἐρυξίμαχον κατακεῖσθαι—ὦ Ἐρυξίμαχε, δίκαιος εἶ ἢ παῦσαί με τῆς λυγγὸς ἢ λέγειν ὑπὲρ ἐμοῦ, ἕως ἂν ἐγὼ παύσωμαι. καὶ τὸν Ἐρυξίμαχον εἰπεῖν ἀλλὰ ποιήσω ἀμφότερα ταῦτα· ἐγὼ μὲν γὰρ ἐρῶ ἐν τῷ σῷ μέρει, σὺ δʼ ἐπειδὰν παύσῃ, ἐν τῷ ἐμῷ. ἐν ᾧ δʼ ἂν ἐγὼ λέγω, ἐὰν μέν σοι ἐθέλῃ ἀπνευστὶ ἔχοντι πολὺν χρόνον παύεσθαι ἡ λύγξ· εἰ δὲ μή, ὕδατι ἀνακογχυλίασον. εἰ δʼ ἄρα πάνυ ἰσχυρά ἐστιν, ἀναλαβών τι τοιοῦτον οἵῳ κινήσαις ἂν τὴν ῥῖνα, πτάρε· καὶ ἐὰν τοῦτο ποιήσῃς ἅπαξ ἢ δίς, καὶ εἰ πάνυ ἰσχυρά ἐστι, παύσεται. οὐκ ἂν φθάνοις λέγων, φάναι τὸν Ἀριστοφάνη· ἐγὼ δὲ ταῦτα ποιήσω.
Transliteration
ei gar tis erastē hōs plousiō ploutoy heneka charisamenos exapatētheiē kai mē laboi chrēmata, anaphanentos tou erastou penētos, ouden hētton aischron dokei gar ho toioutos to ge hautou epideixai, hoti heneka chrēmatōn hotioun an hotōoun hypēretoi, touto de ou kalon. kata ton auton dē logon kan ei tis hōs agathō charisamenos kai autos hōs ameinōn esomenos dia tēn philian erastou exapatētheiē, anaphanentos ekeinou kakou kai ou kektēmenou aretēn, homōs kalē hē apatē dokei gar au kai houtos to kathʼ hauton dedēlōkenai, hoti aretēs gʼ heneka kai tou beltiōn genesthai pan an panti prothymētheiē, touto de au pantōn kalliston houtō pan pantōs ge kalon aretēs gʼ heneka charizesthai. houtos estin ho tēs ouranias theou erōs kai ouranios kai pollou axios kai polei kai idiōtais, pollēn epimeleian anankazōn poieisthai pros aretēn ton te erōnta auton hautou kai ton erōmenon hoi dʼ heteroi pantes tēs heteras, tēs pandēmou. tauta soi, ephē, hōs ek tou parachrēma, ō PHaidre, peri Erōtos symballomai. Pausaniou de pausamenou—didaskoysi gar me isa legein houtōsi hoi sophoi—ephē ho Aristodēmos dein men Aristophanē legein, tychein de autō tina ē hypo plēsmonēs ē hypo tinos allou lynga epipeptōkuian kai ouch hoion te einai legein, allʼ eipein auton—en tē katō gar autou ton iatron Eryximachon katakeisthai—ō Eryximache, dikaios ei ē pausai me tēs lyngos ē legein hyper emou, heōs an egō pausōmai. kai ton Eryximachon eipein alla poiēsō amphotera tauta egō men gar erō en tō sō merei, sy dʼ epeidan pausē, en tō emō. en hō dʼ an egō legō, ean men soi ethelē apneusti echonti polyn chronon pauesthai hē lynx ei de mē, hydati anakonchyliason. ei dʼ ara pany ischyra estin, analabōn ti toiouton hoiō kinēsais an tēn rhina, ptare kai ean touto poiēsēs hapax ē dis, kai ei pany ischyra esti, pausetai. ouk an phthanois legōn, phanai ton Aristophanē egō de tauta poiēsō.
Translation coming soon for this language.
Source edition (provenance)
perseus:tlg0059.tlg011.perseus-grc2; plato:symposium; section 185; transliteration: greek-transliteration (build)