Work 3 · Passage 91
Plato
Greek
· οὐδ’ αὖ Σωκράτους ὑπερέχειν ὅτι Σωκράτης ὁ Σωκράτης ἐστίν, ἀλλ’ ὅτι σμικρότητα ἔχει ὁ Σωκράτης πρὸς τὸ ἐκείνου μέγεθος; ἀληθῆ. οὐδέ γε αὖ ὑπὸ Φαίδωνος ὑπερέχεσθαι τῷ ὅτι Φαίδων ὁ Φαίδων ἐστίν, ἀλλ’ ὅτι μέγεθος ἔχει ὁ Φαίδων πρὸς τὴν Σιμμίου σμικρότητα; ἔστι ταῦτα. οὕτως ἄρα ὁ Σιμμίας ἐπωνυμίαν ἔχει σμικρός τε καὶ μέγας εἶναι, ἐν μέσῳ ὢν ἀμφοτέρων, τοῦ μὲν τῷ μεγέθει ὑπερέχειν τὴν σμικρότητα ὑπέχων, τῷ δὲ τὸ μέγεθος τῆς σμικρότητος παρέχων ὑπερέχον. καὶ ἅμα μειδιάσας, ἔοικα, ἔφη, καὶ συγγραφικῶς ἐρεῖν, ἀλλ’ οὖν ἔχει γέ που ὡς λέγω. συνέφη. λέγω δὴ τοῦδ’ ἕνεκα, βουλόμενος δόξαι σοὶ ὅπερ ἐμοί. ἐμοὶ γὰρ φαίνεται οὐ μόνον αὐτὸ τὸ μέγεθος οὐδέποτ’ ἐθέλειν ἅμα μέγα καὶ σμικρὸν εἶναι, ἀλλὰ καὶ τὸ ἐν ἡμῖν μέγεθος οὐδέποτε προσδέχεσθαι τὸ σμικρὸν οὐδ’ ἐθέλειν ὑπερέχεσθαι, ἀλλὰ δυοῖν τὸ ἕτερον, ἢ φεύγειν καὶ ὑπεκχωρεῖν ὅταν αὐτῷ προσίῃ τὸ ἐναντίον, τὸ σμικρόν, ἢ προσελθόντος ἐκείνου ἀπολωλέναι· ὑπομένον δὲ καὶ δεξάμενον τὴν σμικρότητα οὐκ ἐθέλειν εἶναι ἕτερον ἢ ὅπερ ἦν. ὥσπερ ἐγὼ δεξάμενος καὶ ὑπομείνας τὴν σμικρότητα, καὶ ἔτι ὢν ὅσπερ εἰμί, οὗτος ὁ αὐτὸς σμικρός εἰμι· ἐκεῖνο δὲ οὐ τετόλμηκεν μέγα ὂν σμικρὸν εἶναι· ὡς δ’ αὕτως καὶ τὸ σμικρὸν τὸ ἐν ἡμῖν οὐκ ἐθέλει ποτὲ μέγα γίγνεσθαι οὐδὲ εἶναι, οὐδ’ ἄλλο οὐδὲν τῶν ἐναντίων, ἔτι ὂν ὅπερ ἦν, ἅμα τοὐναντίον γίγνεσθαί τε καὶ εἶναι, ἀλλ’ ἤτοι ἀπέρχεται ἢ ἀπόλλυται ἐν τούτῳ τῷ παθήματι.
Transliteration
oud’ au Sōkratous hyperechein hoti Sōkratēs ho Sōkratēs estin, all’ hoti smikrotēta echei ho Sōkratēs pros to ekeinou megethos; alēthē. oude ge au hypo PHaidōnos hyperechesthai tō hoti PHaidōn ho PHaidōn estin, all’ hoti megethos echei ho PHaidōn pros tēn Simmiou smikrotēta; esti tauta. houtōs ara ho Simmias epōnymian echei smikros te kai megas einai, en mesō ōn amphoterōn, tou men tō megethei hyperechein tēn smikrotēta hypechōn, tō de to megethos tēs smikrotētos parechōn hyperechon. kai hama meidiasas, eoika, ephē, kai syngraphikōs erein, all’ oun echei ge pou hōs legō. synephē. legō dē toud’ heneka, boulomenos doxai soi hoper emoi. emoi gar phainetai ou monon auto to megethos oudepot’ ethelein hama mega kai smikron einai, alla kai to en hēmin megethos oudepote prosdechesthai to smikron oud’ ethelein hyperechesthai, alla dyoin to heteron, ē pheugein kai hypekchōrein hotan autō prosiē to enantion, to smikron, ē proselthontos ekeinou apolōlenai hypomenon de kai dexamenon tēn smikrotēta ouk ethelein einai heteron ē hoper ēn. hōsper egō dexamenos kai hypomeinas tēn smikrotēta, kai eti ōn hosper eimi, houtos ho autos smikros eimi ekeino de ou tetolmēken mega on smikron einai hōs d’ hautōs kai to smikron to en hēmin ouk ethelei pote mega gignesthai oude einai, oud’ allo ouden tōn enantiōn, eti on hoper ēn, hama tounantion gignesthai te kai einai, all’ ētoi aperchetai ē apollytai en toutō tō pathēmati.
Translation coming soon for this language.
Source edition (provenance)
perseus:tlg0059.tlg004.perseus-grc2; plato:phaedo; section 102 part 2; transliteration: greek-transliteration (build)