Work 5 · Passage 3
Plato
Greek
· σὺ δὲ αὐτός, ὦ πρὸς θεῶν, Μένων, τί φῂς ἀρετὴν εἶναι; εἶπον καὶ μὴ φθονήσῃς, ἵνα εὐτυχέστατον ψεῦσμα ἐψευσμένος ὦ, ἂν φανῇς σὺ μὲν εἰδὼς καὶ Γοργίας, ἐγὼ δὲ εἰρηκὼς μηδενὶ πώποτε εἰδότι ἐντετυχηκέναι. ΜΕΝ. ἀλλʼ οὐ χαλεπόν, ὦ Σώκρατες, εἰπεῖν. πρῶτον μέν, εἰ βούλει ἀνδρὸς ἀρετήν, ῥᾴδιον, ὅτι αὕτη ἐστὶν ἀνδρὸς ἀρετή, ἱκανὸν εἶναι τὰ τῆς πόλεως πράττειν, καὶ πράττοντα τοὺς μὲν φίλους εὖ ποιεῖν, τοὺς δʼ ἐχθροὺς κακῶς, καὶ αὐτὸν εὐλαβεῖσθαι μηδὲν τοιοῦτον παθεῖν. εἰ δὲ βούλει γυναικὸς ἀρετήν, οὐ χαλεπὸν διελθεῖν, ὅτι δεῖ αὐτὴν τὴν οἰκίαν εὖ οἰκεῖν, σῴζουσάν τε τὰ ἔνδον καὶ κατήκοον οὖσαν τοῦ ἀνδρός. καὶ ἄλλη ἐστὶν παιδὸς ἀρετή, καὶ θηλείας καὶ ἄρρενος, καὶ πρεσβυτέρου ἀνδρός, εἰ μὲν βούλει, ἐλευθέρου, εἰ δὲ βούλει, δούλου.
Transliteration
sy de autos, ō pros theōn, Menōn, ti phēs aretēn einai; eipon kai mē phthonēsēs, hina eutychestaton pseusma epseusmenos ō, an phanēs sy men eidōs kai Gorgias, egō de eirēkōs mēdeni pōpote eidoti entetychēkenai. MEN. allʼ ou chalepon, ō Sōkrates, eipein. prōton men, ei boulei andros aretēn, rhadion, hoti hautē estin andros aretē, hikanon einai ta tēs poleōs prattein, kai prattonta tous men philous eu poiein, tous dʼ echthrous kakōs, kai auton eulabeisthai mēden toiouton pathein. ei de boulei gynaikos aretēn, ou chalepon dielthein, hoti dei autēn tēn oikian eu oikein, sōzousan te ta endon kai katēkoon ousan tou andros. kai allē estin paidos aretē, kai thēleias kai arrhenos, kai presbyterou andros, ei men boulei, eleutherou, ei de boulei, douloy.
Translation coming soon for this language.
Source edition (provenance)
perseus:tlg0059.tlg024.perseus-grc2; plato:meno; section 71 part 2; transliteration: greek-transliteration (build)